بلوچستان اور خیبرپختونخوا میں سیکیورٹی فورسز کی کارروائیاں، 12 دہشت گرد ہلاک، 2 فوجی اہلکار ہلاک

اسلام آباد + راولپنڈی (ڈیلی اردو رپورٹ) سیکیورٹی فورسز نے بلوچستان اور خیبرپختونخوا کے مختلف اضلاع میں خفیہ اطلاعات پر مبنی کامیاب کارروائیوں میں 12 بھارتی اسپانسرڈ دہشتگردوں کو ہلاک کر دیا، جبکہ دو فوجی اہلکار بہادری سے لڑتے ہوئے ہلاک ہو گئے۔

پاک فوج کے شعبہ تعلقات عامہ (آئی ایس پی آر) کے مطابق یہ آپریشنز کالعدم تحریک طالبان پاکستان (ٹی ٹی پی) اور بلوچستان لبریشن فرنٹ (بی ایل ایف) کے دہشتگردوں کے خلاف کیے گئے۔ خیبرپختونخوا کے ضلع لکی مروت میں 5، بنوں میں 2 اور شمالی وزیرستان کے میر علی میں 2 دہشتگرد ہلاک ہوئے۔ میر علی حملے میں ضلع کرم کے 29 سالہ سپاہی فرہاد علی طوری اور کوہاٹ کے 32 سالہ لانس نائیک صابر آفریدی ہلاک ہو گئے۔

بلوچستان میں، ضلع آواران کے علاقے گشکور میں ایک کارروائی کے دوران دہشتگرد یونس مارا گیا، جبکہ دو زخمی ہوئے۔ ضلع کیچ میں کی گئی کارروائی میں دہشتگرد سرغنہ صابر اللہ اور امجد بیچو ہلاک کیے گئے۔ کارروائیوں کے دوران دہشتگردوں کے قبضے سے اسلحہ، گولہ بارود اور دھماکا خیز مواد بھی برآمد ہوا۔

آئی ایس پی آر کے مطابق تمام مارے گئے دہشتگرد سیکیورٹی فورسز اور معصوم شہریوں کے خلاف دہشتگردی کی متعدد کارروائیوں میں ملوث تھے۔ علاقے میں کلیئرنس اور سینیٹائزیشن آپریشنز جاری ہیں۔

وزیراعظم شہباز شریف نے سیکیورٹی فورسز کی کامیاب کارروائیوں پر انہیں خراج تحسین پیش کرتے ہوئے کہا کہ بھارت کی پاکستان میں عدم استحکام پیدا کرنے کی سازشیں بے نقاب ہو چکی ہیں۔ انہوں نے دہشتگردی کے مکمل خاتمے کے عزم کا اعادہ کیا۔

واضح رہے کہ 18 مئی کو ڈی جی آئی ایس پی آر لیفٹیننٹ جنرل احمد شریف نے کہا تھا کہ بھارت پاکستان میں دہشتگردی کی سرپرستی کر رہا ہے اور اپنے جھوٹے بیانیے کے پیچھے چھپ رہا ہے۔