بلوچستان: آواران میں چوکی پر حملہ، میجر شاہد بشیر ہلاک، سپاہی زخمی

راولپنڈی (ڈیلی اردو) صوبہ بلوچستان کے علاقے آواران میں سکیورٹی فورسز کی چوکی پر دہشت گردوں کے حملے میں پاک فوج کے میجر شاہد بشیر ہلاک ہوگئے، جبکہ جھڑپ دوران دہشت گرد بھاری نقصان اُٹھاتے ہوئے فرار ہوگئے۔

پاکستانی فوج کے شعبہ تعلقات عامہ (آئی ایس پی آر) کے مطابق بلوچستان کے ضلع آواران کے علاقہ کاہان میں گزشتہ رات دہشت گردوں نے فورسز کی چوکی پر حملہ کردیا، فائرنگ کے تبادلے میں میجر شاہد بشیر ہلاک جب کہ ایک سپاہی زخمی ہوگیا۔

آئی ایس پی آر نے بتایا کہ فورسز نے دہشت گردوں کے حملے کو پسپا کرنے کے بعد فرار ہونے والے دہشت گردوں کا قریبی پہاڑوں میں تعاقب کیا، جس پر فرار سے روکنے پر دہشت گردوں نے سیکورٹی فورسز پر فائرنگ شروع کردی، فورسز اور دہشت گردوں کے درمیان فائرنگ اور شدید جھڑپ کے دوران میجر شاہد بشیر ہلاک ہوگئے، جب کہ جھڑپ کے دوران دہشت گردوں کو بھاری نقصان پہنچاتے ہوئے ایک اور سپاہی زخمی ہو گیا۔

آئی ایس پی آر کا کہنا ہے کہ فورسز قوم کے ساتھ مل کر بلوچستان کے امن، استحکام اور ترقی کو سبوتاژ کرنے کی کوششوں کو ناکام بنائیں گی۔