بلوچستان: خضدار میں پولیس افسر کے گھر پر دستی بم حملہ، 5 افراد زخمی

کوئٹہ (ڈیلی اردو) پاکستان کے صوبے بلوچستان میں خضدار شہر میں دستی بم حملے میں ایک پولیس آفیسر کے پانچ رشتہ دار زخمی ہو گئے۔

دستی بم کا حملہ خضدار شہر میں کوشک کے علاقے میں سابق ایس ایچ او خضدار اور موجودہ ایس ایچ او حب سٹی قادر شیخ کے گھر پر کیا گیا۔

ایس ایچ او خضدار پولیس عبدالوہاب ساسولی نے فون پر بتایا کہ نامعلوم افراد نے پولیس آفیسر کے گھر پر دستی بم پھینکا جس کے پھٹنے سے ایس ایچ او کے والد سمیت خاندان کے پانچ افراد زخمی ہو گئے۔

ایس ایچ او کے والد کے سوا باقی چار افراد کی عمریں آٹھ سے 14 سال کے درمیان ہیں۔ زخمیوں کو طبی امداد کی فراہمی کے لیے ٹراما سینٹر منتقل کیا گیا۔

عبدالوہاب ساسولی نے بتایا کہ ایس ایچ او حب کے والد کی حالت تشویشناک تھی جنھیں طبی امداد کی فراہمی کے بعد علاج کے لیے کراچی منتقل کیا گیا۔