بلوچستان: دکی میں نامعلوم افراد کے حملے میں کوئلے کی کان میں کام کرنے والے دو مزدور ہلاک، ایک زخمی

کوئٹہ (ڈیلی اردو/بی بی سی) صوبہ بلوچستان کے ضلع دکی میں نامعلوم مسلح افراد کے حملے میں کوئلے کی کان میں کام کرنے والے دو مزدور ہلاک اور ایک زخمی ہو گیا ہے۔

دکی پولیس کے ایک اہلکار نے فون پر برطانوی خبر رساں ادارے بی بی سی کو بتایا کہ حملہ ٹرائیبل کول مائنز ایریا میں کیا گیا۔ فائرنگ سے دو مزدور ہلاک ہو گئے جبکہ ایک زخمی ہو گیا۔

ہلاک ہونے والوں میں کوئلہ کان کا ایک انجن ڈرائیور بھی شامل ہے۔ ہلاک ہونے والوں کی شناخت کریم اللہ، نعیم اور زخمی کی شناخت فضل الرحمن کے نام سے ہوئی۔

دکی میں گذشتہ ماہ بھی کوئلہ کانوں کے علاقے میں دو بم دھماکے ہوئے تھے۔ ان دھماکوں میں سی ٹی ڈی کا ایک اہلکار سمیت دو افراد ہلاک اور 18 زخمی ہو گئے تھے۔

اس سے قبل نو مزدوروں کو اغوا بھی کیا گیا تھا جن میں سے سات کو بعد میں چھوڑ دیا گیا تھا۔