بلوچستان: سبی میں فائرنگ سے ایس پی خالد زمان مری ہلاک، حملہ آور زخمی حالت میں گرفتار

کوئٹہ (ڈیلی اردو) صوبہ بلوچستان کے ضلع سبی میں نامُعلوم مُسلح افراد نے گاڑی پر فائرنگ کی ہے جس کے نتیجہ میں ایس پی سی ٹی ڈی خالد زمان مری ہلاک ہوگئے۔

پولیس کے مطابق سبی میں نامعلوم مسلح افراد نے ایس پی خالد زمان کی گاڑی پر اندھا دھند فائرنگ کردی۔

ایس پی خالد زمان مری کو 6 گولیاں لگیں جس سے وہ شدید زخمی ہو گئے اور انہیں کمبائنڈ ملٹری ہسپتال منتقل کیا گیا لیکن وہ زخموں کی تاب نہ لاتے ہوئے دم توڑ گئے۔

خالد زمان کے گارڈ کی جوابی فائرنگ سے حملہ آور زخمی ہو گیا جس کو بعد ازاں تعاقب کر کے گرفتار کر لیا گیا۔

سبی سے تعلق رکھنے والے ڈی ایس پی خالد زمان مری ان دنوں تعیناتی کے منتظر تھے۔ حملہ آور کی فائرنگ سے سبی کے صحافی میاں یوسف کی گاڑی کو بھی گولیاں لگیں تاہم وہ معجزانہ طور پر محفوظ رہے۔