بلوچستان: عسکریت پسندوں نے اسسٹنٹ کمشنر افضال باقی کو ہلاک کر دیا، بیٹے کی تلاش جاری

زیارت (نمائندہ ڈیلی اردو) پاکستان کے شورش زدہ صوبے بلوچستان کے ضلع زیارت میں اسسٹنٹ کمشنر محمد افضل باقی کو عسکریت پسندوں نے ہلاک کر دیا ہے، جبکہ ان کے بیٹے کے بارے میں تاحال معلومات موصول نہیں ہوئی ہیں۔ 

اطلاعات کے مطابق افضل باقی اور ان کے بیٹے کو 10 اگست کو زیارت کے علاقے زاہزری سے نامعلوم عسکریت پسندوں نے اغوا کیا تھا۔ اس واقعے میں ان کے گن مین اور ڈرائیور کو بعد میں چھوڑ دیا گیا تھا۔

چند روز قبل عسکریت پسندوں نے اسسٹنٹ کمشنر اور ان کے بیٹے کی ایک ویڈیو بھی جاری کی تھی، جس میں وہ ان کی ڈیمانڈ پوری کرنے کی اپیل کرتے ہوئے نظر آئے تھے۔

بلوچستان حکومت نے زیارت کے علاقے زاہزری سے اغوا ہونے والے اسسٹنٹ کمشنر اور ان کے بیٹے کے عسکریت پسندوں کا سراغ لگانے کے لیے 5 کروڑ روپے کے نقد انعام کا اعلان کیا تھا۔ 

نوٹی فکیشن میں عوام، قبائلی عمائدین اور میڈیا نمائندگان سے بھی اپیل کی گئی کہ وہ عسکریت پسندوں سے متعلق مصدقہ معلومات فراہم کریں۔ حکومت نے اس بات کی یقین دہانی بھی کروائی کہ معلومات فراہم کرنے والے شخص کا نام مکمل صیغہ راز میں رکھا جائے گا تاکہ ان کی سلامتی یقینی بنائی جا سکے۔

اتوار کی سہہ پہر اسسٹنٹ کمشنر کی لاش کی تصویر منظر عام پر آنے کے بعد زیارت انتظامیہ کے ایک اہلکار نے اس کی تصدیق کی کہ یہ لاش انھی کی ہے، تاہم اصل لاش اب تک برآمد نہیں ہوئی۔ زیارت کے تحصیلدار نور محمد نے بھی تصدیق کرتے ہوئے بتایا کہ قتل کے بعد لاش ہرنائی کے علاقے میں پھینکی گئی، جہاں اس کی تلاش جاری ہے۔

وزیر اعلیٰ بلوچستان میر سرفراز بگٹی نے اس قتل کی شدید مذمت کی اور کہا کہ افضل باقی ایک فرض شناس، محنتی اور قابل افسر تھے۔ انہوں نے وعدہ کیا کہ ان کے قتل اور اغوا میں ملوث افراد کو جلد کیفر کردار تک پہنچایا جائے گا۔

محمد افضل باقی پنجاب کے علاقے تونسہ شریف سے تعلق رکھتے تھے۔ انہوں نے بلوچستان میں اپنی ملازمت پٹواری کے طور پر شروع کی اور بعد ازاں ترقی پاتے ہوئے اسسٹنٹ کمشنر کے عہدے تک پہنچے۔ اغوا سے قبل وہ زیارت کی تحصیل زیارت میں اسسٹنٹ کمشنر کے طور پر فرائض انجام دے رہے تھے۔

حکام کا کہنا ہے کہ لاش کی تلاش اور مجرموں کی گرفتاری کے لیے خصوصی کارروائیاں جاری ہیں۔