بلوچستان میں بم دھماکے اور شدت پسندوں کا حملہ: ایک اہلکار سمیت چار افراد ہلاک، تین زخمی

کوئٹہ (ڈیلی اردو) پاکستان کے شورش زدہ صوبے بلوچستان کے دو مختلف اضلاع ڈیرہ بگٹی اور شیرانی میں بم دھماکوں اور شدت پسندوں کے حملے میں ایک سکیورٹی اہلکار سمیت چار افراد ہلاک اور تین زخمی ہو گئے۔

لیویز فورس کے مطابق ڈیرہ بگٹی کی تحصیل سوئی کے علاقے لنجو سغاری میں زرعی زمین پر نصب بارودی سرنگوں کے دو دھماکوں میں ایک خاتون، ایک بزرگ شخص اور ایک اور شخص ہلاک جبکہ ایک بچی زخمی ہو گئی۔ ان واقعات کی تحقیقات شروع کر دی گئی ہیں تاہم تاحال کسی گروہ نے ذمہ داری قبول نہیں کی۔

ادھر ضلع شیرانی کے علاقے میر علی خیل میں نامعلوم شدت پسندوں نے گزشتہ شب پولیس اور لیویز فورس کے تھانوں پر حملہ کیا۔ ڈپٹی کمشنر حضرت ولی کاکڑ کے مطابق شدت پسندوں اور فورسز کے درمیان دو گھنٹے تک فائرنگ کا تبادلہ ہوا، جس کے نتیجے میں بلوچستان کانسٹیبلری کا ایک اہلکار ہلاک جبکہ لیویز فورس کے دو اہلکار زخمی ہوئے۔

ڈائریکٹر جنرل لیویز فورس عبدالغفار مگسی کے مطابق شدت پسند ایک لیویز اہلکار کو اغوا کرکے ساتھ لے گئے اور ایک گاڑی سمیت متعدد سامان کو آگ لگا دی۔ حکام کا کہنا ہے کہ حملہ آوروں کے خلاف سرچ آپریشن جاری ہے۔