بلوچستان میں سی ٹی ڈی اور قانون نافذ کرنے والے اداروں کا آپریشن، کئی دہشت گرد گرفتار

کوئٹہ (ڈیلی اردو) صوبہ بلوچستان میں کاؤنٹر ٹیررزم ڈیپارٹمنٹ (سی ٹی ڈی ) اور قانون نافذ کرنے والے اداروں نے انٹیلیجنس پر مبنی کامیاب آپریشن کرتے ہوئے کئی خطرناک دہشتگردوں کو گرفتار کرلیا۔

https://x.com/ctd_balochistan/status/1801133220911546430?t=L_bjI0WZ-Smq9HXyptn2tw&s=19

سی ٹی ڈی کے مطابق انٹیلیجنس ایجنسی اور قانون نافذ کرنے والے اداروں نے بلوچستان میں کالعدم تنظیم تحریک طالبان پاکستان (ٹی ٹی پی) کے مراکز قائم کرنے کی کوشش ناکام بنادی۔

پکڑے جانے والوں میں کالعدم تحریک طالبان پاکستان کی شوریٰ کا انتہائی خطرناک اور مطلوب کمانڈر شامل ہے۔

ابتدائی تفتیش کے مطابق نیٹ ورک کے تانے بانے اندرونی و بیرونی دہشتگروں سے ملتے ہیں، گرفتار کیا گیا کمانڈر مختلف علاقوں میں دہشتگردی کی کارروائیوں میں ملوث تھا، مزید تفتیش جاری ہے، ملک میں موجود مختلف دہشتگردوں کے گٹھ جوڑ کے بارے میں اہم راز افشاں ہونے کی توقع بھی کی جارہی ہے۔

یاد رہے کہ اس سے قبل یکم اپریل سے 10 جون کے دوران سکیورٹی فورسز نے بلوچستان میں 4 ہزار 902 آپریشنز کیے جن میں 51 دہشتگرد ہلاک کیے گئے جب کہ مئی کے دوران بلوچستان میں 12 دہشتگردوں کو گرفتار بھی کیا گیا۔

سکیورٹی ذرائع کا بتانا تھا کہ فورسز نے ژوب بارڈ ر سے دراندازی کرنے والے 7 دہشتگردوں کو ہلاک کیا تھا اور 2 کو گرفتار بھی کیا گیا تھا، پشین اور قلعہ عبداللہ میں بھی دراندازی کی کوشش کرنیوالے 5 دہشتگردوں کو ہلاک اور ایک کو گرفتار کیا گیا تھا۔