بلوچستان میں عسکریت پسندوں کے حملوں میں 6 اہلکار ہلاک، 4 زخمی

کوئٹہ (نمائندگان ڈیلی اردو) پاکستان کے شورش زدہ صوبے بلوچستان کے ضلع کیچ کے علاقے زامران میں بلوچ عسکریت پسندوں کے حملے کے نتیجے میں سیکورٹی فورسز کے چھ اہلکار ہلاک جبکہ چار  زخمی ہوگئے ہیں۔

سرکاری اور مقامی ذرائع کے مطابق 146 ونگ، نوانو سیکٹر میں سیکورٹی فورسز کی گاڑی کے قریب بارودی سرنگ پھٹنے سے نائیک طاہر، نائیک بلال، سپاہی تحسین، لانس نائیک رب نواز اور سپاہی منیر  ہلاک ہوئے۔ زخمیوں میں سپاہی زین اظہر اور سپاہی علی زمان شامل ہیں۔

کالعدم بلوچ لبریشن آرمی (بی ایل اے) نے اس واقعے کی ذمہ داری قبول کی ہے۔ تنظیم کے ترجمان جیئند بلوچ نے میڈیا کو جاری بیان میں دعویٰ کیا ہے کہ زامران میں عسکریت پسندوں کے حملے میں دس اہلکار ہلاک ہوئے۔

ترجمان کے مطابق بلوچ لبریشن آرمی کے عسکریت پسندوں نے قلات کے علاقے مورگند میں بھی ایک فوجی پوسٹ کو نشانہ بنایا، جس میں ان کے بقول ایک اہلکار ہلاک اور دو زخمی ہوئے۔