بلوچستان: پنجگور میں ایف سی پر حملے ناکام، 6 دہشت گرد ہلاک

کوئٹہ (ڈیلی اردو) پاکستان کے شورش زدہ صوبے بلوچستان کے ضلع پنجگور میں گزشتہ رات ایک نہایت سنگین صورتحال پیدا ہوئی، جہاں مبینہ طور پر دہشت گردوں نے مختلف رہائشی گھروں کو نشانہ بنایا۔

ذرائع کے مطابق مختلف  گھروں پر مسلح افراد نے دھاوا بول کر چادر و چار دیواری کا تقدس پامال کیا۔ حملہ آوروں نے لوٹ مار کے ساتھ خواتین اور معصوم بچوں پر بھی ظلم و تشدد کیا، گھروں سے قیمتی سامان چھین لیا گیا اور بعض گاڑیوں کو آگ لگا دی گئی۔

واقعے کی اطلاع ملتے ہی ایف سی نے فوری اور مؤثر کارروائی کرتے ہوئے دہشت گردوں کا تعاقب کیا۔ جوابی کارروائی میں 6 دہشت گرد موقع پر ہلاک کر دیے گئے، جبکہ ان کے قبضے سے بھاری مقدار میں اسلحہ، گولہ بارود اور دیگر جنگی سامان بھی برآمد ہوا۔