بلوچستان: کیچ میں دھماکا، کیپٹن سمیت پانچ اہلکار ہلاک

کوئٹہ (نمائندہ ڈیلی اردو) پاکستان کے شورش زدہ صوبے بلوچستان کے ضلع کیچ میں آئی ای ڈی دھماکے میں پاک فوج کے کیپٹن سمیت پانچ اہلکار ہلاک ہوگئے، جبکہ جوابی کارروائی میں کالعدم بلوچ لبریشن آرمی (بی ایل اے) کے پانچ دہشت گرد مارے گئے۔

پاکستانی فوج کے شعبہ تعلقات عامہ (آئی ایس پی آر) کے مطابق، 15 ستمبر کو ضلع کیچ کے علاقے شیر بندی میں سیکیورٹی فورسز کی گاڑی کو آئی ای ڈی کے ذریعے نشانہ بنایا گیا۔

دھماکے کے نتیجے میں کیپٹن وقار احمد، نائیک اسمت اللہ، لانس نائیک جنید احمد، لانس نائیک خان محمد اور سپاہی محمد ظہور ہلاک ہوگئے۔

ترجمان کے مطابق، فورسز نے فوری جوابی کارروائی کرتے ہوئے بی ایل اے کے پانچ دہشت گردوں کو ہلاک کر دیا، جبکہ علاقے میں مزید دہشت گردوں کی تلاش کے لیے سرچ آپریشن جاری ہے۔

نمائندہ ڈیلی اردو کے مطابق دہشتگردوں نے ضلع کیچ کی تحصیل دشت اور مند کے درمیانی علاقے شند میں گاڑی کو دیسی ساختہ بم ( آئی ای ڈی) سے حملے کا نشانہ بنایا ہے۔

اس واقعے کی ذمہ داری کالعدم عسکریت پسند تنظیم بلوچ لبریشن آرمی نے قبول کی ہے ۔

یہ حملہ بلوچستان میں جاری دہشت گردی کی لہر کا تسلسل ہے، جس میں دشمن عناصر دہشتگردی کی کارروائیاں کر رہے ہیں۔