بلوچستان: کیچ میں مسلح افراد کا حملہ، دو پاکستانی فوجی ہلاک

راولپنڈی + اسلام آباد (ڈیلی اردو/ڈی پی اے) پاکستان کے جنوب مغربی صوبے بلوچستان میں مسلح حملہ آوروں کے ساتھ ایک جھڑپ میں دو فوجی ہلاک ہو گئے ہیں۔ بتایا گیا ہے کہ حملہ آوروں نے ایک سکیورٹی چیک پوسٹ پر دھاوا بولا۔

پاکستانی فوج کے شعبہ تعلقات عامہ (آئی ایس پی آر ) کے مطابق بلوچستان کے ضلع کیچ میں دہشت گردوں نے سیکیورٹی فورسز کی چیک پوسٹ پر حملہ کردیا، جس کے بعد سیکیورٹی فورسز اور دہشت گردوں کے درمیان فائرنگ کے تبادلے میں 2 سیکیورٹی اہلکار لائس نائیک منظر عباس اور سپاہی عبدالفتح ہلاک ہوگئے۔

آئی ایس پی آر کے مطابق لائس نائیک منظر عباس کا تعلق صوبہ پنجاب کے شہر خوشاب جبکہ سپاہی عبدالفتح کا تعلق بلوچستان کے شہر خضدار سے تھا۔

یہ حملہ ایک ایسے وقت میں ہوا ہے، جب سکیورٹی فورسز پر پاکستانی طالبان کے حملوں میں اضافے کی ایک لہر دیکھی جا رہی ہے۔ پاکستانی حکومت الزام عائد کرتی ہے کہ ان شدت پسندوں کے ٹھکانے افغانستان میں ہیں۔

پاکستانی وزیراعظم عمران خان اپنے ایک حالیہ بیان میں عندیہ دے چکے ہیں کہ حکام پاکستانی طالبان کے ساتھ مذاکرات میں مصروف ہیں۔ پاکستانی حکام کے مطابق افغانستان پر طالبان کے قبضے کے بعد پاکستانی طالبان کے حوصلے بھی بڑھے ہیں۔ یہ بات اہم ہے کہ پاکستانی فوج افغانستان سے ملحق کئی اضلاع میں طویل فوجی آپریشن کر چکی ہے اور فوجی دعویٰ ہے کہ ملک سے پاکستانی طالبان کے ڈھانچے کو ختم کر دیا گیا ہے۔ اسی تناظر میں ماضی کے مقابلے میں طالبان کے حملوں میں خاصی کمی تو دیکھی گئی ہے تاہم وقتاﹰ فوقتاﹰ عسکریت پسندوں کی جانب سے دہشت گردی کی کارروائیاں دیکھنے میں بھی آتی رہتی ہیں۔

بلوچستان پاکستان کا سب سے بڑا اور پسماندہ صوبہ ہے، جہاں مذہبی شدت پسندوں کے علاوہ فرقہ وارنہ بنیادوں پر متحرک عسکریت پسند اور قوم پرست باغی سرگرم ہیں۔

خبر رساں ادارے ڈی پی اے کے مطابق بلوچستان میں تشدد کے زیادہ تر واقعات میں قوم پرست باغی ملوث ہوتے ہیں، جو پاک چین اقتصادی راہ داری کے منصوبے سے خائف ہیں اور بلوچستان میں چینی سرمایہ کاری کو رد کرتے ہیں۔ اس منصوبے کے تحت بلوچستان میں سڑکوں اور دیگر انفراسٹکچر پر کام ہو رہا ہے۔ اسی صوبے میں فرقہ ورانہ بنیادوں پر شیعہ ہزارہ برداری پر حملوں کے واقعات بھی دیکھنے میں آتے ہیں۔