بلوچستان: گوادر کے شہر پسنی میں دھماکا، کیپٹن سمیت دو اہلکار ہلاک

اسلام آباد (ش ح ط) صوبہ بلوچستان کے ضلع گوادر کے ساحلی شہر پسنی میں بارودی سرنگ کے ایک دھماکے میں پاک فوج کے ایک افسر، اور سپاہی سمیت دو اہلکار ہلاک ہوگئے۔

پاکستان فوج کے شعبہ تعلقات عامہ (آئی ایس پی آر) کے مطابق یہ واقعہ بدھ کو پسنی کے بازار خدا بخش میں پیش آیا۔

آئی ایس پی آر سے جاری بیان کے مطابق دہشت گردوں نے امپرووائزڈ ایکسپلوزیو ڈیوائس (آئی ای ڈی) سے سیکیورٹی فورسز کو نشانہ بنایا۔

آئی ایس پی آر کا کہنا ہے کہ ہلاک ہونے والوں میں کیپٹن عفان مسعود اور سپاہی بابر زمان شامل ہیں جبکہ دہشت گردوں کو پکڑنے کیلئے سرچ آپریشن جاری ہے۔

آئی ایس پی آر کا کہنا تھا کہ دشمن ایجنسیوں کی حمایت سے دہشت گردوں کی اس طرح کی بزدلانہ کارروائیاں بلوچستان میں سخت محنت سے حاصل کیے گئے امن اور خوشحالی کو سبوتاژ نہیں کرسکتیں۔

بیان میں مزید کہا گیا کہ سیکیورٹی فورسز ہر طرح سے اس قسم کے گھناؤنے افعال کو بے اثر کرنے کیلئے پرعزم ہیں۔