بنوں میں سی ٹی ڈی ٹیم پر حملہ، فائرنگ میں طالبان کمانڈر ہلاک

بنوں (ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں محکمہ انسداد دہشت گردی (سی ٹی ڈی) کی تفتیشی ٹیم پر دہشت گردوں نے حملہ کر دیا، فائرنگ کے تبادلے میں ایک طالبان کمانڈر ہلاک ہو گیا۔

سی ٹی ڈی بنوں کی ٹیم اسسٹنٹ کمشنر شمالی وزیرستان شاہ ولی خان پر حملے کی جائے وقوعہ کی نشاندہی کے لیے جا رہی تھی کہ راستے میں دہشت گردوں نے فائرنگ کر دی۔

حکام کے مطابق فائرنگ کے دوران زیر حراست دہشت گرد کمانڈر اُسامہ عرف دانیال عرف باغی ہلاک ہو گیا۔

سی ٹی ڈی کے مطابق ہلاک کمانڈر نئی شدت پسند تنظیم “اتحاد المجاہدین پاکستان” کا سرگرم رکن اور مبینہ ماسٹر مائنڈ تھا۔

بیان میں کہا گیا کہ دہشت گرد کو چھڑانے کے لیے سی ٹی ڈی ٹیم پر حملہ کیا گیا۔

جوابی فائرنگ میں ایک اور دہشت گرد کامیاب خان عرف اخلاص یار ولد نبوت خان سکنہ کابل خیل شیواہ، شمالی وزیرستان ہلاک ہوا۔

حکام کے مطابق ہلاک دہشت گرد کے قبضے سے ایک کلاشنکوف، دو میگزین اور دو ہینڈ گرینیڈز برآمد ہوئے جبکہ حملہ آور فرار ہوتے ہوئے اپنے زخمی ساتھیوں کو بھی ساتھ لے گئے۔

آئی جی خیبر پختونخوا ذوالفقار حمید اور ایڈیشنل آئی جی سی ٹی ڈی نے جوانوں کو بروقت کارروائی پر شاباش دی۔ آئی جی کا کہنا تھا کہ دہشت گرد کسی کے سگے نہیں ہوتے اور مفاد کی خاطر اپنے ساتھیوں پر بھی فائر کھول دیتے ہیں۔