بنوں: پی ٹی آئی کے سابق صوبائی وزیر کے حجرے پر فضائی بمباری، 16 طالبان ہلاک

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع بنوں کی تحصیل بکا خیل کے علاقے نرمی خیل میں آج صبح تقریباً چار بجے فضائی بمباری کی گئی، جس میں ایک اسکول اور پاکستان تحریک انصاف کے سابق صوبائی وزیر ملک شاہ محمد کے حجرے (حویلی) کو نشانہ بنایا گیا۔

مقامی ذرائع کے مطابق، کارروائی کے وقت وہاں تحریک طالبان پاکستان (ٹی ٹی پی) کے شدت پسند اور طالبان کمانڈر صدیق اللہ گربز کے ساتھی موجود تھے۔ عینی شاہدین نے بتایا کہ دھماکوں کے بعد علاقے میں خوف و ہراس پھیل گیا اور سیکیورٹی فورسز کی بھاری نقل و حرکت دیکھی گئی۔

بنوں سے حاصل شدہ ابتدائی شواہد کے مطابق تقریباً 16 پاکستانی طالبان کے معاونین ہلاک اور 7 زخمی ہوئے ہیں۔ سیکیورٹی حکام کا کہنا ہے کہ نشانہ بنائی گئی دونوں جگہیں ٹی ٹی پی اور حافظ گل بہادر گروپ کے عسکریت پسندوں کے زیر استعمال تھیں، تاہم کسی اہم کمانڈر یا ہائی ویلیو ٹارگٹ کے مارے جانے کی تصدیق ابھی نہیں ہو سکی۔

اب تک کسی بھی سرکاری یا عسکری ذرائع کی جانب سے اس فضائی حملے کی باضابطہ تصدیق یا تردید نہیں کی گئی۔

یاد رہے کہ بنوں اور ملحقہ اضلاع میں پہلے بھی شدت پسندوں کے ٹھکانوں کو نشانہ بنانے کے لیے فضائی اور زمینی آپریشنز کیے جاتے رہے ہیں، اور مزید تفصیلات آنے کا انتظار ہے۔