بھارت: دہشت گردی کے مرکز ‘ٹیررستان’ کو کوئی رعایت نہ دی جائے، پاکستان کا سخت ردعمل

نیویارک (ش ح  ط) بھارتی وزیر خارجہ سبرامنیم جے شنکر نے ہفتہ 27 ستمبر کی رات اقوام متحدہ کی جنرل اسمبلی کے اجلاس سے خطاب کرتے ہوئے کہا کہ پاکستان دہشت گردی کی حمایت کرتا ہے اور عالمی برادری کو پاکستان کے حوالے سے اپنی آنکھیں بند نہیں رکھنی چاہئیں۔

جے شنکر نے اپنی تقریر میں پاکستان کا نام براہِ راست نہیں لیا لیکن ‘ٹیررستان’ کے لفظ سے واضح اشارہ دیا کہ ان کے مطابق دہشت گردی کے کئی بڑے حملوں کا تعلق اسی ملک سے ہے۔ اُن کا کہنا تھا کہ بھارت کو اپنی آزادی کے بعد سے لے کر اب تک دہشت گردی کا سامنا ہے اور گزشتہ کئی دہائیوں میں بین الاقوامی دہشت گردانہ حملوں کے سراغ اسی ملک تک جاتے ہیں۔ انہوں نے اپریل میں پہلگام میں معصوم سیاحوں کے قتل کو اس کا تازہ ثبوت قرار دیا۔

پاکستان کا شدید ردعمل

اقوام متحدہ میں پاکستانی مشن کے انڈر سیکریٹری محمد راشد نے بھارتی وزیر خارجہ کے بیان کو پاکستان کو بدنام کرنے کی کوشش قرار دیا۔ اُن کا کہنا تھا کہ حقیقت یہ ہے کہ پاکستان نے دہشت گردی کے خلاف 90 ہزار سے زائد جانوں کا نذرانہ پیش کیا ہے، جسے عالمی برادری بھی تسلیم کرتی ہے۔ محمد راشد نے کہا کہ بھارت خود دہشت گردوں کا سہولت کار ہے اور جنوبی ایشیا کو اپنے توسیع پسندانہ عزائم اور بنیاد پرست نظریے کے تحت یرغمال بنا رہا ہے۔

انڈیا کا دوبارہ مؤقف

بھارت کے سیکنڈ سیکریٹری سری نواس نے پاکستانی ردعمل پر کہا کہ اگرچہ جے شنکر نے کسی ملک کا نام نہیں لیا، پاکستان نے اس پر ردعمل دے کر تسلیم کر لیا کہ سرحد پار دہشت گردی کا مرکز وہی ہے۔ اُن کا کہنا تھا کہ کوئی دلیل یا جھوٹ ‘ٹیررستان’ کے جرائم کو چھپا نہیں سکتا۔

پاکستانی ردعمل کا جواب

محمد راشد نے بھارتی مؤقف پر دوبارہ جواب دیتے ہوئے کہا کہ انڈیا کی یہ حرکت شرمناک ہے کہ وہ بار بار اقوام متحدہ میں ایک رُکن ملک کا نام بگاڑ رہا ہے۔ اُن کا کہنا تھا کہ ایک خودمختار ریاست کے نام کا مذاق اڑانا پوری قوم کو بدنام کرنے اور ان کی توہین کرنے کی دانستہ کوشش ہے۔ انہوں نے مزید کہا کہ یہ کوئی سیاسی جلسہ نہیں بلکہ بغیر کسی ٹھوس دلیل کے ایسی باتیں کی جا رہی ہیں جو سنجیدہ بحث کے لائق نہیں۔