بھارت: ڈی آر ڈی او راجستھان کے مینیجر پاکستان کیلئے جاسوسی کے الزام میں گرفتار

نئی دہلی (ڈیلی اردو) انڈیا کی ریاست راجستھان میں پولیس نے دفاعی تحقیقاتی ادارے ڈی آر ڈی او کے گیسٹ ہاؤس مینیجر مہندر پرساد کو پاکستان کے لیے جاسوسی کے الزام میں گرفتار کر لیا ہے۔ پولیس کے مطابق پرساد پاکستانی خفیہ ایجنسی آئی ایس آئی کو اہم دفاعی معلومات فراہم کر رہے تھے۔

راجستھان پولیس کے سی آئی ڈی انسپکٹر جنرل ڈاکٹر وشنو کانت کے مطابق، انڈیا کے یوم آزادی کے موقع پر ملک دشمن سرگرمیوں پر سخت نگرانی کے دوران مہندر پرساد کو ایک ہفتہ قبل حراست میں لیا گیا تھا۔ ملزم جے پور میں سنٹرل انٹروگیشن سینٹر میں پوچھ گچھ کے بعد باقاعدہ گرفتار کیا گیا۔

پولیس کا دعویٰ ہے کہ پرساد پاکستانی انٹیلیجنس ہینڈلر سے مسلسل رابطے میں تھے اور ڈی آر ڈی او کے سائنسدانوں اور فوجی اہلکاروں کی معلومات فراہم کر رہے تھے۔ 32 سالہ مہندر پرساد اترا کھنڈ کے رہائشی ہیں اور سرحدی ضلع جیسلمیر کے چندن فیلڈ فائرنگ رینج میں گیسٹ ہاؤس مینیجر تھے۔

چندن فیلڈ فائرنگ رینج انڈیا کے دفاعی ساز و سامان کی ٹسٹنگ کے اہم مراکز میں شامل ہے، جہاں سائنسدان اور فوجی افسران آتے ہیں۔ رینج کے اطراف کے علاقے انتہائی سکیورٹی والے زون میں شمار ہوتے ہیں۔

مہندر پرساد کو آج عدالت میں پیش کیا جائے گا، جہاں ان کے جسمانی ریمانڈ کی استدعا کی جائے گی۔