بھارتی حملہ: پاکستانی فوج کے مزید 2 زخمی اہلکار دم توڑ گئے، ہلاکتیں 13 ہو گئیں

راولپنڈی (ڈیلی اردو) انڈیا کے ساتھ حالیہ کشیدگی کے دوران زخمی ہونے والے پاک فوج اور فضائیہ کے دو مزید اہلکار دم توڑ گئے ہیں، جس کے بعد ہلاک اہلکاروں کی تعداد 13 ہو گئی ہے۔ پاک فوج کے شعبہ تعلقات عامہ (آئی ایس پی آر) کے مطابق، دم توڑنے والے اہلکاروں میں حوالدار محمد نوید اور پاکستان فضائیہ کے سینیئر ٹیکنیشن محمد ایاز شامل ہیں۔

آئی ایس پی آر کا کہنا ہے کہ 6 اور 7 مئی کو انڈین افواج کی جانب سے کی گئی مبینہ جارحیت میں نہ صرف سیکیورٹی فورسز کو نشانہ بنایا گیا بلکہ عام شہری بھی زد میں آئے، جن میں خواتین، بچے اور بزرگ شامل تھے۔ بیان میں کہا گیا ہے کہ مجموعی طور پر 78 اہلکار زخمی ہوئے ہیں۔

فوجی ترجمان کے مطابق، “ہلاک اہلکاروں کی قربانی ان کے حوصلے، فرض سے وفاداری، اور غیر متزلزل حب الوطنی کی علامت ہے، جو قومی تاریخ کا حصہ بن چکی ہے اور آنے والی نسلوں کے لیے جرات و قربانی کی مثال بنی رہے گی۔”

فوجی ذرائع کے مطابق صورتحال بدستور کشیدہ ہے اور پاکستانی افواج کسی بھی ممکنہ کارروائی کے لیے الرٹ پر ہیں۔ حکومتی سطح پر بھی سفارتی اقدامات اور عالمی برادری سے رابطے جاری ہیں تاکہ خطے میں کشیدگی کو کم کیا جا سکے۔