بھارتی فوج کی ایل او سی نکیال اور رکھ چکری سیکٹرز پر فائرنگ، 2 شہری شہید، 3 زخمی

راولپنڈی (نمائندہ ڈیلی اردو) بھارتی فوج کی ایل او سی نکیال اور رکھ چکری سیکٹرز پر فائرنگ سے 2 شہری شہید، 3 زخمی ہوگئے۔

بھارتی فوج کی جانب سے جان بوجھ کر لائن آف کنٹرول پر پاکستانی آبادی کو بلااشتعال فائرنگ اور گولہ باری کا نشانہ بنانے کا سلسلہ جاری ہے۔

بھارتی بلا اشتعال فائرنگ کے نتیجے میں آئے دن معصوم شہری اپنی جانوں سے ہاتھ دھو رہے ہیں یا زخمی ہو کر زندگی بھر کی معذوری کا شکار ہو رہے ہیں۔

پاک فوج کے شعبہ تعلقات عامہ کے مطابق بھارتی فوج نے ایل او سی نکیال اور رکھ چکری سیکٹرز پر بلا اشتعال فائرنگ کی جس میں انہوں ںے شہری آبادی کو نشانہ بنایا۔

آئی ایس پی آر کے مطابق بھارتی فوج کی فائرنگ سے 60 سالہ خاتون سلامت بی بی اور 13 سالہ ذیشان شہید ہوگئے جب کہ دو خواتین سمیت تین شہری زخمی ہوئے ہیں۔ زخمی ہونے والے 3 شہریوں کو اسپتال منتقل کیا گیا ہے جہاں انہیں طبی امداد دی گئی۔