تاجکستان–افغانستان سرحد پر کشیدگی، چین کی اپنے شہریوں کو فوری انخلا کی ہدایت

بیجنگ (ڈیلی اردو ) تاجکستان اور افغانستان کے سرحدی علاقے میں سنگین سکیورٹی صورتحال کے پیشِ نظر تاجکستان میں قائم چینی سفارت خانے نے ایک بار پھر اپنے شہریوں کو سرحدی علاقوں سے فوری انخلا کی ہدایت جاری کر دی ہے۔

چینی میڈیا کے مطابق، پیر کے روز جاری کردہ سکیورٹی الرٹ میں چینی سفارت خانے نے خبردار کیا ہے کہ تاجکستان اور افغانستان کی سرحد پر صورتحال بدستور کشیدہ ہے اور کسی بھی وقت مزید سکیورٹی واقعات پیش آ سکتے ہیں۔

سفارت خانے کے بیان کے مطابق اتوار کی شام افغانستان کے صوبہ بدخشاں سے تعلق رکھنے والے چار مسلح افغان شہری غیر قانونی طور پر تاجکستان کے جنوبی صوبہ خاتلون میں داخل ہوئے، جنہیں تاجک سرحدی فورسز نے کارروائی کے دوران ہلاک کر دیا۔

چینی سفارت خانے نے سرحدی علاقوں میں کام کرنے والی چینی کمپنیوں اور وہاں مقیم چینی شہریوں پر زور دیا ہے کہ وہ سکیورٹی صورتحال پر کڑی نظر رکھیں، حفاظتی انتظامات مزید مضبوط بنائیں اور جلد از جلد حساس سرحدی علاقوں سے انخلا یقینی بنائیں۔

اس کے علاوہ چینی شہریوں کو واضح ہدایت دی گئی ہے کہ وہ تاجکستان اور افغانستان کے سرحدی علاقوں کا غیر ضروری سفر نہ کریں۔

یاد رہے کہ 26 نومبر 2025 کو تاجکستان کے صوبہ خاتلون کے سرحدی ضلع شمس الدین شوہین میں ہونے والے ایک مسلح حملے میں تین چینی شہری ہلاک جبکہ ایک زخمی ہو گیا تھا۔ اس کے بعد 30 نومبر کو اسی علاقے میں ایک اور حملے میں بھی چینی شہریوں کو جانی نقصان پہنچا تھا، جس کے بعد چینی سفارت خانے نے پہلا سکیورٹی الرٹ جاری کیا تھا۔