توہین مذہب کا قانون کسی کے خلاف استعمال نہیں ہوگا، ترجمان پی ڈی ایم حافظ حمد اللّٰہ

اسلام آباد (ڈیلی اردو) پاکستان کی حزب مخالف کی متعدد جماعتوں پر مشتمل پاکستان ڈیموکریٹک موومنٹ (پی ڈی ایم) کے ترجمان حافظ حمد اللّٰہ نے شیری مزاری کے اقوام متحدہ کو لکھے گئے خط کی مذمت کرتے ہوئے کہا ہے کہ خط عالمی اسٹیبلشمنٹ کو پاکستانی اندرونی سیاست میں مداخلت کی دعوت ہے۔

حافظ حمد اللّٰہ نے کہا کہ توہین مذہب کا قانون کسی کے خلاف استعمال نہیں ہوگا، ملکی قوانین کے تحت کسی کو توہین مذہب کی بھی اجازت نہیں۔

ترجمان پی ڈی ایم نے کہا کہ گورنر پنجاب کا آرمی چیف کو خط اسٹیبلشمنٹ کو سیاست میں مداخلت کی دعوت ہے۔

انہوں نے کہا کہ گورنر آئین اور حلف کی خلاف ورزی کر رہے ہیں، وہ جس پہاڑی کمک کے منتظر ہیں وہ انہیں نہیں ملے گی۔

واضح رہے کہ پاکستان تحریک انصاف کی رہنما اور سابق وزیر انسانی حقوق شیریں مزاری نے حکومت کے خلاف اقوامِ متحدہ کے مندوب کو خط لکھا ہے۔

شیریں مزاری نے یو این ہائی کمشنر برائے انسانی حقوق کو بھی خصوصی مراسلہ ارسال کیا۔

اپنے خط میں شیریں مزاری نے لکھا کہ حکومت نے دہشت گردوں کے اتحادی مبینہ قاتل کو وزیر داخلہ مقرر کیا ہے۔

خط کے متن میں الزام عائد کیا گیا ہے کہ سانحہ ماڈل ٹاؤن کا ملزم ریاستی سطح پر سیاسی مخالفین کے خلاف توہینِ مذہب کارڈ استعمال کر رہا ہے۔