تھائی لینڈ اور کمبوڈیا میں سرحدی جھڑپیں، 10 افراد ہلاک، درجنوں زخمی

فنون پین/بینکاک (ڈیلی اردو) تھائی لینڈ اور کمبوڈیا کے درمیان رواں ہفتے ہونے والی جھڑپیں جولائی میں ہونے والی پانچ روزہ مہلک لڑائی کے بعد سب سے شدید قرار دی جا رہی ہیں، جن میں درجنوں افراد ہلاک ہوئے تھے اور بعد ازاں امریکی صدر ڈونلڈ ٹرمپ کی مداخلت سے ایک کمزور جنگ بندی طے پائی تھی۔

تازہ جھڑپیں منگل کو متنازع سرحد کے نئے علاقوں تک پھیل گئیں، جس کے بعد سرحدی آبادیوں سے بڑے پیمانے پر نقل مکانی شروع ہوگئی، کیونکہ ٹرمپ کی کرائی گئی جنگ بندی ہلاکت خیز جھڑپوں کے بعد ناکام ثابت ہوئی۔ 

حکام کے مطابق لڑائی میں دونوں جانب کم از کم 10 فوجی اور شہری ہلاک جبکہ ایک لاکھ 40 ہزار سے زائد افراد متاثرہ علاقوں سے فرار ہو چکے ہیں، جہاں جنگی طیارے، ٹینک اور ڈرون کارروائیاں جاری ہیں۔

دونوں ملکوں کے درمیان 800 کلومیٹر طویل نوآبادیاتی دور کی سرحد کا تعین متنازع ہے اور تاریخی مندروں پر دعوے اکثر فریقین کو مسلح تصادم تک لے آتے ہیں۔

تازہ جھڑپوں کے بارے میں دونوں حکومتیں ایک دوسرے کو ذمہ دار ٹھہرا رہی ہیں۔ اے ایف پی کے مطابق سرکاری بیانات سے ظاہر ہوتا ہے کہ لڑائی منگل تک دونوں ملکوں کے کم از کم پانچ صوبوں تک پھیل چکی تھی۔

کمبوڈیا کے بااثر سابق رہنما ہن سین کا کہنا ہے کہ ان کے ملک نے جوابی کارروائی کی ہے، حالانکہ کمبوڈیا نے ابتدائی دو دنوں تک اس کی تردید کی تھی، جبکہ تھائی لینڈ فضائی اور زمینی حملوں کا اعلان کر رہا تھا۔

تھائی فوج کے مطابق پیر سے اب تک اس کے تین فوجی ہلاک اور 29 زخمی ہوئے ہیں، جبکہ کمبوڈیا کی وزارتِ دفاع کا کہنا ہے کہ اس کے سات شہری ہلاک اور تقریباً 20 زخمی ہوئے ہیں۔