تھائی لینڈ اور کمبوڈیا میں شدید سرحدی جھڑپیں؛ ایک تھائی فوجی ہلاک، چار زخمی

فنون پین/بینکاک (ڈیلی اردو) تھائی لینڈ اور کمبوڈیا کے درمیان متنازع سرحدی علاقوں میں کشیدگی ایک بار پھر بڑھ گئی ہے، تازہ جھڑپوں میں ایک تھائی فوجی ہلاک اور چار زخمی ہوئے ہیں۔ تھائی رائل آرمی نے دعویٰ کیا ہے کہ کمبوڈیا کی جانب سے فائرنگ کے بعد اس نے کمبوڈیا کے اندر ’متعدد فوجی اہداف‘ پر فضائی حملے کیے ہیں۔ 

تھائی حکام کا کہنا ہے کہ پیر کی صبح کمبوڈیائی فورسز کی سرحد پار فائرنگ سے اس کے فوجی ہلاک ہوئے، جبکہ کمبوڈیا نے اس دعوے کی تردید کرتے ہوئے کہا ہے کہ حملہ اصل میں تھائی لینڈ نے کیا اور کمبوڈین فوج نے کوئی جوابی کارروائی نہیں کی۔ تھائی فوج کا کہنا ہے کہ اسے متنازع سرحد سے 20 کلومیٹر دور کمبوڈیا کے شہر سمراونگ میں T-55 ٹینکوں کی نقل و حرکت کا بھی پتہ چلا ہے۔

 تھائی حکام نے مزید الزام لگایا ہے کہ کمبوڈیا صوبہ سی ساکیٹ کے قریب تھائی فوجیوں کو نشانہ بنانے کے لیے ڈرون، مشین گنیں اور گرینیڈ استعمال کر رہا ہے جبکہ شمال مشرقی تھائی لینڈ کے سرحدی گاؤں بان کروات کے شہری علاقوں پر BM-21 MLRS راکٹ بھی فائر کیے گئے ہیں۔ 

کمبوڈیا نے تمام الزامات مسترد کرتے ہوئے کہا ہے کہ جارحیت شروع کرنے والا ملک تھائی لینڈ ہے اور کمبوڈیا نے کوئی جوابی حملہ نہیں کیا۔ جھڑپوں کے بعد تھائی حکام نے سا کیو شہر سمیت سرحدی علاقوں میں شہریوں کو انخلا کے احکامات جاری کیے ہیں، جو کمبوڈیا کی سرحد سے تقریباً 48 کلومیٹر کے فاصلے پر اور بنکاک سے 200 کلومیٹر مشرق میں واقع ہے۔

 اتوار کے روز بھی تھائی فوج نے دعویٰ کیا تھا کہ صوبہ سی سا کیٹ میں دونوں ملکوں کے درمیان 35 منٹ تک فائرنگ کا تبادلہ ہوا جس کے بعد تین سرحدی صوبوں میں بھی انخلا کا فیصلہ کیا گیا۔ جولائی میں شدید جھڑپوں کے نتیجے میں درجنوں افراد کی ہلاکت کے بعد ملائیشیا کی ثالثی سے جنگ بندی معاہدہ ہوا تھا، جو اس وقت کے امریکی صدر ڈونلڈ ٹرمپ کی جانب سے تھائی لینڈ اور کمبوڈیا کے ساتھ ٹیرف مذاکرات روکنے کی دھمکی کے بعد ممکن ہوا تھا، اور اسی سلسلے میں اکتوبر میں ایک ڈکلیریشن پر دستخط کیے گئے تھے۔ 

تاہم گزشتہ ماہ تھائی لینڈ نے جھڑپوں کے بعد یکطرفہ طور پر اس ڈکلیریشن کو معطل کر دیا تھا جس کے بعد خطے میں دوبارہ بڑے پیمانے پر تصادم کے خدشات بڑھ گئے ہیں۔