جرمنی میں چاقو کے حملے سے 3 افراد ہلاک، 4 زخمی، داعش نے ذمہ داری قبول کرلی

برلن (ڈیلی اردو/بی بی سی) جرمنی کے شہر زولنگن کی پولیس کا کہنا ہے کہ چاقو سے کیے گئے ایک حملے میں تین افراد ہلاک اور چار زخمی ہوئے ہیں۔

یہ حملہ جمعے کی شب ہوا جب شہر کے مرکز میں ایک تقریب جاری تھی۔ اطلاعات کے مطابق تاحال پولیس حملہ آور کو پکڑ نہیں سکی ہے۔

جرمن میڈیا بیلت کے مطابق حملہ آور نے راہ چلتے لوگوں پر چاقو سے وار کیے۔ حملہ آور کی تلاش جاری ہے اور پولیس کے ہیلی کاپٹروں کو شہر کے اوپر اُڑتے دیکھا جاسکتا ہے۔

یہ صنعتی شہر اپنے قیام کا 650واں سال منا رہا تھا۔

حکام نے لوگوں کو مرکز سے نکلنے کی ہدایت دی ہے اور پولیس نے جائے وقوعہ کے اطراف پر رکاوٹیں لگائی ہیں۔

ذرائع ابلاغ کی خبروں کے مطابق ایمرجنسی ورکرز زخمی شہریوں کو طبی امداد فراہم کر رہے ہیں۔

پولیس نے حملہ آور کی تلاش کے لیے 40 ٹیکٹیکل وہیکلز تعینات کیے ہیں۔ ان گاڑیوں پر سپیشل ٹاسک فورس کے اہلکار سوار ہیں۔

سڑکوں پر رکاوٹیں لگائی گئی ہیں اور شہریوں کو اس تلاش کے دوران گھروں میں رہنے کا کہا گیا ہے۔

تقریب کے منتظمین میں سے ایک فلپ مولر نے کہا کہ نو لوگوں کی زندگیاں خطرے میں ہیں جنھیں ایمرجنسی ورکرز طبی امداد فراہم کر رہے ہیں۔ ’لوگ حیران ہیں۔ لیکن وہ پُرامن طریقے سے مرکز سے چلے گئے۔‘

عینی شاہدین کا کہنا ہے کہ انھیں معلوم تھا کہ کچھ گڑ بڑ ہے جب انھوں نے دیکھا کہ سٹیج پر موجود گلوکار کے چہرے کے تاثرات بدل گئے ہیں۔ لارس نامی عینی شاہد نے بتایا کہ ’مجھ سے صرف ایک میٹر دور ایک شخص گِر گیا تھا۔‘

جرمن میڈیا کے مطابق حملہ آور نے بظاہر جان بوجھ کر چاقو سے لوگوں کو گردن پر وار کیے۔ پولیس ترجمان نے کہا ہے کہ اب تک کی معلومات کے مطابق صرف ایک حملہ آور تھا۔

اس تین روزہ تقریب میں ہر رات 25 ہزار لوگوں کے اجتماع کی توقع تھی۔ مگر اب اسے منسوخ کر دیا گیا ہے۔

دوسری جانب زولنگن میں ہونےوالی تقریب پر چاقو بردار شخص کے حملے کی ذمہ داری شدت پسند تنظیم داعش نے قبول کی ہے۔

ڈیلی اردو کے مطابق داعش نے حملے کی ذمہ داری قبول کا بیان شدت پسند تنظیم کے خبر رساں ادارے ‘عماق’ پر جاری کیا ہے۔