جماعت الدعوۃ کے سربراہ حافظ سعید کے گھر کے باہر دھماکے کا ماسٹر مائنڈ گرفتار

لاہور (مانیٹرنگ ڈیسک) کالعدم جماعت الدعوۃ کے سربراہ حافظ سعید کے گھر کے باہر کچھ عرصہ قبل ہونے والے دھماکے کی تفتیش میں اہم پیش رفت ہوئی ہے اور دہشتگردی کے اس واقعے کے ماسٹر مائنڈ کو گرفتار کرلیا گیا ہے۔

کاؤنٹر ٹیررازم ڈیپارٹمنٹ (سی ٹی ڈی) لاہور کے ڈی آئی جی سی افضال کوثر نے پریس کانفرنس میں بتایا کہ لاہور کے علاقے جوہر ٹاؤن میں کچھ عرصہ پہلےکیے گئے دھماکے کی تفتیش میں اہم پیش رفت ہوئی ہے۔

سی ٹی ڈی حکام نے دھماکے کے ماسٹر مائنڈ سمیت 2 افراد کو گرفتار کر لیا ہے جبکہ سی ٹی ڈی نے جامعہ کراچی میں دہشت گردی کے بعد پنجاب میں بھی فیلڈ یونٹس کو الرٹ کردیا ہے۔

ڈی آئی جی سی ٹی ڈی افضال کوثر نے لاہور میں پریس کانفرنس میں بتایا کہ دھماکے کے ماسٹر مائنڈ سمیع الحق اور سہولت کار عزیر اکبر کو گرفتار کر لیا گیا ہے، واقعے میں غیر ملکی ہاتھ ملوث تھا۔

ملزم عید گل کی ٹاسکنگ اور لاجسٹک سپورٹ سمیع الحق نے کی تھی، اس واقعے میں خاتون سمیت 5 افراد کو پہلے ہی عدالت سے سزا ہو چکی ہے۔

ڈی آئی جی سی ٹی ڈی کا کہنا تھا کہ جامعہ کراچی میں دہشت گردی کے بعد فیلڈ یونٹس کو الرٹ کردیا گیا، تمام ڈسٹرکٹ پولیس کو بھی سکیورٹی بڑھانے کا کہہ دیا ہے۔

یاد رہے کہ 23 جون 2021 کو لاہور کے علاقے جوہر ٹاؤن میں حافظ سعید کی رہائش گاہ کے قریب ہونے والے دھماکے میں ایک بچے سمیت تین افراد ہلاک ہو گئے تھے۔