جنوبی وزیرستان میں بم دھماکہ، 3 پولیس افسران سمیت 4 افراد ہلاک، 31 زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع جنوبی وزیرستان کے علاقے وانا رستم بازار میں ہونے والے بم دھماکے کے نتیجے میں تین پولیس سب انسپکٹرز سمیت چار افراد ہلاک جبکہ 30 سے زائد زخمی ہو گئے ہیں۔

ڈیلی اردو کے مطابق دھماکہ لوئر وانا کے مصروف رستم بازار میں ہوا، جس کے نتیجے میں بڑی تعداد میں راہگیر بھی زخمی ہوئے۔

ذرائع کا کہنا ہے کہ زخمیوں میں کئی افراد کی حالت تشویش ناک بتائی جا رہی ہے۔ زخمیوں میں چار سب انسپکٹرز شامل تھے جن میں سے تین ہلاک ہو گئے۔

تمام زخمیوں کو فوری طور پر ڈی ایچ کیو اسپتال وانا منتقل کر دیا گیا ہے جہاں ایمرجنسی نافذ کر دی گئی ہے۔

ڈی ایس پی اصغر علی شاہ کے مطابق دھماکے میں عام شہریوں کے ساتھ پولیس اہلکار بھی زخمی ہوئے ہیں اور امدادی کارروائیاں جاری ہیں۔