جنوبی وزیرستان میں فوجی قافلے پر طالبان کا حملہ، 12 پاکستانی اہلکار ہلاک، 4 زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع جنوبی وزیرستان کے علاقے بدر ویلی میں فوجی قافلے پر حملے میں 12 اہلکار ہلاک اور 4 شدید زخمی ہوگئے۔ 

کالعدم تحریک طالبان پاکستان (ٹی ٹی پی) نے حملے کی ذمہ داری قبول کرتے ہوئے اسلحہ قبضے میں لینے کا دعویٰ کیا ہے۔ یہ جنوبی وزیرستان میں دسمبر 2024 کے بعد سب سے مہلک حملہ ہے۔ اُس وقت ایک حملے میں 16 فوجی ہلاک ہوگئے تھے جس کے بعد پاکستان نے افغانستان میں فضائی کارروائیاں کی تھیں۔

پاکستانی فوج کے شعبہ تعلقات عامہ (آئی ایس پی آر) کے مطابق پہلا آپریشن جنوبی وزیرستان میں کیا گیا، جس میں سکیورٹی فورسز نے 13 شدت پسندوں کو ہلاک کیا۔ فوج کا کہنا ہے کہ شدت پسندوں کی فائرنگ سے اس آپریشن کے دوران 12 فوجی اہلکار بھی مارے گئے۔

اس کے علاوہ ضلع باجوڑ میں بھی ایک انٹیلیجنس بیسڈ آپریشن کیا گیا۔ آئی ایس پی آر کے مطابق ’فائرنگ کے شدید تبادلے‘ میں 22 شدت پسند مارے گئے۔

مقامی ذرائع کے مطابق باجوڑ میں ہونے والے اس آپریشن میں سکیورٹی فورسز کو بھی بھاری جانی نقصان پہنچا ہے۔

گزشتہ ایک ہفتے کے دوران خیبر پختونخوا اور بلوچستان میں شدت پسندوں اور بلوچ عسکریت پسندوں کے حملوں میں چالیس سے زائد فوجی ہلاک ہوگئے ہیں۔

سیکیورٹی حکام کے مطابق صرف شمالی و جنوبی وزیرستان، باجوڑ، مہمند اور لوئر دیر میں جھڑپوں اور حملوں کے نتیجے میں درجنوں اہلکار مارے گئے جبکہ متعدد زخمی ہوئے۔ اس کے علاوہ بلوچستان کے مختلف اضلاع میں بھی سیکیورٹی فورسز پر حملوں میں ہلاکتیں رپورٹ ہوئی ہیں۔