جنوبی وزیرستان میں چیک پوسٹ پر حملہ، ایک فوجی ہلاک، 2 زخمی

اسلام آباد (ش ح ط) صوبہ خیبر ہختونخوا کے قبائلی ضلع جنوبی وزیرستان میں ایک چوکی پر خودکار ہتھیاروں کے حملے کے نتیجے میں ایک اہلکار ہلاک جبکہ دو زخمی ہوگئے ہیں۔

پولیس ذرائع نے ڈیلی اردو کو بتایا ہے کہ بدھ کی رات تحصیل سراروغہ کے علاقے ٹیبی لنگر خیل میں سکیورٹی فورسز کی ایک چیک پوسٹ پر نامعلوم دہشت گردوں نے خودکار ہتھیاروں سے حملہ کیا۔

انہوں نے کہا کہ حملے میں پاکستانی فوج کا ایک اہلکار ہلاک جبکہ دو زخمی ہوگئے ہیں جنہیں ایک ہیلی کاپٹر کے ذریعے ملٹری ہسپتال منتقل کر دیا گیا ہے۔

حکام کے مطابق خودکار ہتھیاروں کے حملے میں چیک پوسٹ کو بھی نقصان پہنچا ہے۔

سیکیورٹی فورسز نے دہشتگردوں کو پکڑنے کے لیے علاقے کا محاصرہ کر لیا ہے۔

دوسری جانب کالعدم تنظیم تحریک طالبان پاکستان نے چیک پوسٹ پر حملے کی ذمہ داری قبول کرلی ہے۔