جوہری کشیدگی: پاکستانی وزیر اعظم نے نیشنل کمانڈ اتھارٹی کا ہنگامی اجلاس طلب کر لیا

راولپنڈی (ڈیلی اردو) پاکستانی فوج کے شعبہ تعلقات عامہ (آئی ایس پی آر) کے مطابق، وزیر اعظم شہباز شریف نے آج نیشنل کمانڈ اتھارٹی (NCA) کا ہنگامی اجلاس طلب کر لیا ہے۔ یہ اقدام بھارت اور پاکستان کے درمیان جاری فوجی کشیدگی کے پیش نظر کیا گیا ہے، جہاں دونوں ملکوں نے ایک دوسرے پر میزائل حملوں کے الزامات عائد کیے ہیں۔

نیشنل کمانڈ اتھارٹی کا بنیادی مقصد پاکستان کی تینوں افواج کی مشترکہ حکمت عملی تیار کرنا اور سب سے بڑھ کر پاکستان کے جوہری اسلحے کی نگرانی اور استعمال سے متعلق فیصلے کرنا ہے۔ این سی اے کی صدارت وزیر اعظم کرتے ہیں، جبکہ وزیر خارجہ، وزیر دفاع، وزیر داخلہ، وزیر خزانہ اور وزیر برائے دفاعی پیداوار بھی اس کا حصہ ہوتے ہیں۔

عسکری سطح پر جوائنٹ چیفس آف اسٹاف کمیٹی کے چیئرمین، پاک فوج، بحریہ اور فضائیہ کے سربراہان کے ساتھ ساتھ اسٹریٹیجک پلانز ڈویژن (SPD) کے ڈائریکٹر بھی اجلاس میں شریک ہوتے ہیں۔ این سی اے کا سیکریٹری بھی ایس پی ڈی کے پاس ہی ہوتا ہے۔

یہ صورت حال خطے میں ایک سنگین مرحلے کی جانب اشارہ کرتی ہے، جو بہت سے تجزیہ کاروں کے مطابق برصغیر کے لیے ایک خطرناک موڑ ہے۔ جوہری ہتھیاروں سے لیس دونوں ملکوں نے اب ایک دوسرے پر میزائل داغنے کے دعوے کیے ہیں، جس سے صورتحال شدید کشیدہ ہو چکی ہے۔

پاکستانی فوج کا دعویٰ ہے کہ اس نے انڈیا کے ایک ایئربیس، ایئرفیلڈ اور میزائل اسٹوریج یونٹ کو کامیابی سے نشانہ بنایا ہے۔ اگر یہ دعویٰ درست ہے تو یہ ایک سنگین اشتعال انگیزی تصور کی جا رہی ہے۔

پاکستان کا کہنا ہے کہ یہ کارروائی بھارت کے جانب سے کیے گئے میزائل حملوں کا ردعمل ہے، جن میں ایک حملہ اسلام آباد کے قریب بھی کیا گیا تھا۔ بھارت کی جانب سے اب تک پاکستانی دعوؤں کی کوئی تصدیق یا تردید سامنے نہیں آئی۔

خطے میں کشیدگی کی شدت اس وقت اپنے عروج پر ہے۔ دونوں جانب ہونے والے نقصان اور ردعمل کی نوعیت ہی اب آنے والے دنوں میں اگلا راستہ طے کرے گی۔

عالمی برادری کے لیے یہ لمحہ تشویشناک ہے۔ جب دونوں فریق جذباتی کیفیت میں ہوں، تو کوئی بھی معمولی غلط فہمی بڑے سانحے کو جنم دے سکتی ہے۔