حیدرآباد میں سی ٹی ڈی کی کارروائی، ایس آر اے کے 3 دہشت گرد گرفتار

حیدر آباد (نمائندہ ڈیلی اردو ) پاکستان کے صوبہ سندھ کے ضلع حیدرآباد میں محکمہ انسداد دہشت گردی (سی ٹی ڈی) نے قاسم آباد میں کارروائی کرتے ہوئے ریلوے ٹریک پر دہشتگردی کی کوشش ناکام بنا دی اور کالعدم تنظیم سندھ ریوولوشنری آرمی (SRA) سے تعلق رکھنے والے تین دہشت گرد گرفتار کرلیے۔

گرفتار ملزمان کی شناخت عامر لطیف چانگ، شعیب چانگ اور شعبان چانگ کے ناموں سے ہوئی ہے۔

سی ٹی ڈی کے مطابق ملزمان کے قبضے سے دو ہینڈ گرینیڈ، بارودی مواد، ڈیٹونیٹر، بال بیئرنگ، نٹ بولٹ، ریموٹ کنٹرول، تاریں اور دیگر غیر قانونی اسلحہ برآمد ہوا۔

ترجمان نے بتایا کہ گرفتار عامر لطیف چانگ ریلوے ٹریک پر بم دھماکے کا مرکزی ملزم ہے، جس کے سر کی قیمت 20 لاکھ روپے مقرر تھی۔ ملزمان پنجاب جانے والے کارگو ٹریلرز پر فائرنگ کے واقعات میں بھی ملوث رہے ہیں۔

سی ٹی ڈی کے مطابق دہشت گردوں نے یہ منصوبہ نور چانڈیو کی ہدایت پر بنایا تھا، تاہم 14 اگست کو سخت سیکیورٹی کے باعث یہ ناکام ہوگیا۔

ترجمان کے مطابق مزید گرفتاریاں متوقع ہیں اور تحقیقات جاری ہیں۔