خیبر: جمرود میں گاڑی پر فائرنگ، ایک پولیس اہلکار سمیت 2 افراد ہلاک، 3 زخمی

باڑہ (نمائندہ ڈیلی اردو) صوبہ خیبر پختونخوا کے قبائلی ضلع خیبر کی تحصیل جمرود میں ایک گاڑی پر ہونے والے ایک حملے میں ایک پولیس اہلکار کلیم اللہ سمیت دو افراد ہلاک اور تین زخمی ہوگئے ہیں۔

ابتدائی اطلاعات کے مطابق یہ واقعہ جمعرات کی شام ٹیڈی بازار کے قریب قبرستان میں پیش آیا۔ ذرائع کا کہنا ہے کہ یہ اہلکار ایک پرائیویٹ گاڑی میں جا رہے تھے کہ ان کو نشانہ بنایا گیا۔‘‘ فائرنگ سے ایک ٹیکسی ڈرائیور بھی چل بسا جبکہ تین دیگر زخمی ہوگئے۔

فائرنگ کے بعد ملزمان فرار ہونے میں کامیاب ہوگئے۔

ادھر اس واقعے کی اطلاع ملتے ہی پولیس اور سیکیورٹی فورسز کی بھاری نفری جائے وقوعہ پہنچی اور سارے علاقے کو گھیرے میں لے لیا۔

سیکورٹی اہلکاروں پر دوسرا حملہ ضلع خیبر کے علاقے وادی تیراہ میں ہوا اور سرکاری ذرائع کے مطابق یہاں فائرنگ کے تبادلے میں ایف سی کے دو اہلکار ہلاک ہوئے۔