خیبر پختونخوا: بنوں میں تھانے میریان پر دہشت گردوں کا حملہ

بنوں (ڈیلی اردو) صوبہ خیبر پختونخوا کے ضلع بنوں میں دہشت گردوں نے تھانہ میریان پر حملہ کیا، تاہم جوابی فائرنگ سے حملہ آور پسپا ہو گئے۔

پولیس کے مطابق تھانہ میریان پر دہشت گردوں کی جانب سے دُور سے فائرنگ کی گئی، جس کی زد میں آکر وہاں نصب تھرمل کیمرے ناکارہ ہو گئے۔

جوابی فائرنگ کے بعد حملہ آور پسپا ہو گئے۔ واقعے میں کسی قسم کے جانی نقصان کی اطلاع نہیں مل سکی۔ ابتدائی اطلاعات کے مطابق دہشت گردوں نے تھانے پر دو اطراف سے حملہ کیا۔

واضح رہے کہ گزشتہ ماہ بھی ضلع بنوں کے علاقے تھانہ میریان کی حدود میں پولیس پارٹی پر حملے میں ملوث ایک دہشت گرد کو آپریشن کے دوران ہلاک کردیا گیا تھا۔آپریشن کے دوران 2 پولیس اہلکار ہلاک اور 2 زخمی ہوگئے تھے۔

تھانہ میریان کی حدود ٹیری رام میں پولیس پارٹی پر ایک دہشت گرد نے حملہ کیا تھا، جس کے نتیجے میں 2 پولیس اہلکار زخمی ہوگئے۔ اس دوران جوابی فائرنگ میں دہشت گرد زخمی بھی ہوا، جو فرار ہوکر ایک گھر میں جا چھپا تھا۔ بعد ازاں آپریشن کے دوران پولیس اہلکار گھر میں داخل ہوئے تو دہشت گرد نے فائرنگ کردی، جس کی زد میں آکر اے ایس آئی سمیت 2 اہلکار ہلاک ہو گئے تھے۔