خیبر پختونخوا میں دہشتگردی: رواں سال 66 پولیس اہلکار ہلاک، 476 واقعات رپورٹ

پشاور (ڈیلی اردو رپورٹ) پاکستان کے صوبے خیبر پختونخوا میں دہشتگردی کے خلاف جاری جنگ میں اب تک 2,289 پولیس اہلکار ہلاک ہو چکے ہیں۔ صرف رواں سال کے ابتدائی سات ماہ کے دوران دہشتگردی کے 476 واقعات رپورٹ ہوئے، جن میں 66 پولیس اہلکار ہلاک اور 90 زخمی ہوئے ہیں۔

سنٹرل پولیس ذرائع کے مطابق، رواں سال دہشتگردی کے سب سے زیادہ 77 واقعات شمالی وزیرستان میں پیش آئے۔ بنوں میں 74، لکی مروت میں 48 اور ڈی آئی خان میں 44 واقعات رپورٹ ہوئے۔

دہشتگرد حملوں میں 121 عام شہری ہلاک اور 301 زخمی ہوئے۔ اس کے علاوہ 10 خاصہ دار بھی ہلاک یا زخمی ہوئے، جبکہ فرنٹیئر کانسٹیبلری (ایف سی) کے 48 اہلکار ہلاک اور 109 زخمی ہوئے۔ مجموعی طور پر فورسز کے 55 اہلکار ہلاک اور 112 زخمی ہوئے۔

رواں سال پولیس پر سب سے زیادہ حملے بنوں میں ہوئے جہاں 15 اہلکار ہلاک اور 16 زخمی ہوئے۔ لکی مروت میں 9، جبکہ جنوبی وزیرستان اور پشاور میں 6،6 پولیس اہلکار ہلاک ہوئے۔

انسپکٹر جنرل پولیس ذوالفقار حمید کے مطابق جنوبی اضلاع میں دہشتگردوں کے خلاف پولیس کو جدید اسلحہ فراہم کیا جا رہا ہے، جبکہ پولیس چوکیوں اور تھانوں کو مزید مضبوط بنانے کا عمل جاری ہے۔