خیبرپختونخوا اور بلوچستان میں کارروائیاں، 49 دہشتگرد ہلاک

اسلام آباد(ڈیلی اردو) سیکیورٹی فورسز اور قانون نافذ کرنے والے اداروں نے پاکستان کے شورش زدہ  صوبہ خیبرپختونخوا اور بلوچستان کے مختلف علاقوں میں انٹیلی جنس اطلاعات کی بنیاد پر مشترکہ کارروائیاں کرتے ہوئے 49 دہشتگردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق گزشتہ چند روز کے دوران دہشتگردی کے خلاف مختلف آپریشنز کیے گئے، جن کا مقصد دہشتگرد نیٹ ورکس کو ختم کرنا اور امن و امان کو درپیش خطرات کا سدباب کرنا تھا۔

بیان کے مطابق خیبرپختونخوا کے اضلاع بنوں، شمالی وزیرستان، اورکزئی اور خیبر میں کارروائیوں کے دوران 12 دہشتگرد مارے گئے۔ آپریشنز کے دوران اسلحہ، گولہ بارود، بارودی مواد، ریموٹ ڈیوائسز اور دیگر سامان بھی برآمد کیا گیا۔

آئی ایس پی آر کے مطابق بلوچستان کے مستونگ، مچھ، خضدار اور پنجگور میں 10 انٹیلی جنس بیسڈ آپریشنز کیے گئے، جن کے دوران 37 دہشتگرد ہلاک ہوئے۔ کارروائیوں میں بڑی مقدار میں اسلحہ اور دھماکا خیز مواد بھی قبضے میں لیا گیا۔

ترجمان کے مطابق آپریشنز کے بعد متعلقہ علاقوں میں مزید دہشتگردوں کی موجودگی کے خدشے کے پیش نظر کلیئرنس کارروائیاں جاری ہیں۔ آئی ایس پی آر کا کہنا ہے کہ سیکیورٹی فورسز ملک میں دہشتگردی کے خاتمے اور امن کے قیام کے لیے اپنی کارروائیاں جاری رکھیں گی۔