خیبرپختونخوا: دہشتگردی کے واقعات میں 67 خواتین ملوث، 49 گرفتار، 4 ہلاک

پشاور (ڈیلی اردو) خیبرپختونخوا میں دہشت گردی کے واقعات میں خواتین کے ملوث ہونے کا انکشاف ہوا ہے، مختلف کارروائیوں اور تحقیقات کے دوران 67 خواتین کو دہشت گردی میں ملوث پایا گیا ہے۔ ان میں سے 49 کو گرفتار کیا جا چکا ہے جبکہ 4 خواتین سیکیورٹی فورسز کے آپریشنز کے دوران ہلاک ہوئیں۔

کاؤنٹر ٹیررازم ڈیپارٹمنٹ (سی ٹی ڈی) کی رپورٹ کے مطابق یہ خواتین صوبے کے 7 اضلاع سے تعلق رکھتی ہیں اور ان میں سے بیشتر کالعدم تنظیموں کے لیے کام کرتی رہی ہیں۔ رپورٹ میں بتایا گیا ہے کہ ان خواتین پر دہشت گردی کی منصوبہ بندی، سہولت کاری اور حملوں میں براہ راست یا بالواسطہ کردار ادا کرنے کے الزامات ہیں۔

سی ٹی ڈی کے مطابق اس وقت بھی 14 خواتین مختلف مقدمات میں مطلوب ہیں۔ سیکیورٹی اداروں نے ان کی گرفتاری کے لیے آپریشنز کا دائرہ وسیع کر دیا ہے اور باقی مطلوبہ خواتین کی تلاش کے لیے کوششیں جاری ہیں۔

حکام کا کہنا ہے کہ خواتین کی دہشت گردی میں شمولیت ایک نیا چیلنج ہے جس سے نمٹنے کے لیے حکمت عملی کو مزید مؤثر بنایا جا رہا ہے۔