دکی : گاڑی بارودی سرنگ سے ٹکرا گئی، 3 سگے بھائی ہلاک، ایک شخص زخمی

دکی(ڈیلی اردو) بلوچستان کے شورش زدہ ضلع دکی کی تحصیل لونی کے علاقے کلی بختیار خان میں بارودی مواد کے دھماکے سے ایک گاڑی کو نشانہ بنایا گیا، جس کے نتیجے میں تین سگے بھائی ہلاک جبکہ ایک شخص زخمی ہوگیا۔

پولیس کے مطابق چار افراد گاڑی میں سوار ہوکر زمینداری کے کام سے جارہے تھے کہ کلی بختیار خان کے قریب ندی سے گزرتے ہوئے گاڑی دھماکے کی زد میں آگئی۔ دھماکے کے نتیجے میں رحمت اللہ، دورانی اور نعمت اللہ ولد سلطان موقع پر ہلاک ہوگئے جبکہ عتیق اللہ ولد مولوی نیک محمد زخمی ہوا۔

لاشوں اور زخمی شخص کو اسپتال منتقل کردیا گیا۔ واقعے کے فوراً بعد سکیورٹی فورسز اور قانون نافذ کرنے والے اداروں نے علاقے کو گھیرے میں لے کر سرچ آپریشن شروع کردیا۔

پولیس کا کہنا ہے کہ ابتدائی شواہد کی بنیاد پر دھماکے میں آئی ای ڈی کے استعمال کا شبہ ہے، تاہم واقعے کی نوعیت اور ذمہ داروں کا تعین کرنے کے لیے مزید تحقیقات جاری ہیں۔