رائیونڈ میں سالانہ عالمی تبلیغی اجتماع کا پہلا مرحلہ ختم ہوگیا

لاہور (ڈیلی اردو) تبلیغی اجتماع کا پہلا مرحلہ رقت آمیز دعا کے ساتھ ختم ہوگیا۔ مولانا ابراہیم نے اجتماعی دعا کروائی جبکہ ملکی اور غیر ملکی لاکھوں فرزندان اسلام نے شرکت کی۔ اجتماع کے موقع پر سکیورٹی کے فول پروف انتظامات کیے گئے تھے۔

تین روزہ تبلیغی اجتماع کے آخری روز مولانا خورشید نے اپنے خطاب میں مسلمانوں کو اپنی زندگی اللہ اور اس کے رسول صلی اللہ علیہ وسلیم کے بتائے ہوئے طریقوں پر گزارنے کی تلقین کی۔ جس کے بعد مولانا ابراہیم نے اجتماعی دعا کروائی۔

اجتماع کے آخری روز ملک و غیر ملکی فرزندان اسلام کی بڑی تعداد نے اجتماعی دعا میں شرکت کی۔ اجتماعی دعا میں پاکستان کی خوشحالی اور ترقی کے لیے خصوصی دعائیں کی گئیں۔ دعا کے وقت ہر آنکھ اشک بار تھی اور اللہ کے حضور گڑگڑا کر اسکی رحمت کی طلب گار تھا۔ دعا کے بعد ہزاروں تشکیل شدہ جماعتیں دین اسلام کی تبلیغ کیلئے اندرون اور بیرون ملک روانہ ہو گئے۔

پنجاب پولیس کی جانب سے سیکیورٹی کے فول پروف انتظامات کئے گئے تھے۔ سی سی ٹی وی کیمرے لگا کر پنڈال کی مکمل نگرانی کی گئی۔ ڈی آئی جی آپریشنز لاہور اشفاق خان نے بھرپور سیکیورٹی انتظامات پر پولیس افسران و اہلکاروں کو شاباش دیتے ہوئے کہا کہ تمام افسران و اہلکاروں نے دن رات محنت کر کے اجتماع کے شرکا کو فول پروف سکیورٹی فراہم کی۔