راولپنڈی: توہینِ مذہب کے ملزم کو بائی پولر ڈس آرڈر کا مریض قرار دے دیا گیا

راولپنڈی (ڈیلی اردو) راولپنڈی کے بینظیر بھٹو ہسپتال کے میڈیکل بورڈ نے توہینِ مذہب کے ایک زیرِ حراست ملزم کو بائی پولر ڈس آرڈر ٹائپ ون کا مریض قرار دیتے ہوئے اس کے نفسیاتی علاج، باقاعدہ فالو اَپ اور مسلسل نگرانی کی سفارش کی ہے۔

ڈان اخبار کے مطابق 26 سالہ ملزم کو گزشتہ برس 30 اکتوبر کو گرفتار کیا گیا تھا۔ پولیس نے 4 نومبر 2024 کو عدالت سے میڈیکل معائنے کی اجازت لی تھی تاہم سرکاری سستی اور تاخیر کے باعث جیل حکام نے 9 ماہ بعد یعنی 23 جولائی کو ہسپتال کے میڈیکل سپرنٹنڈنٹ کو خط لکھ کر بورڈ بنانے کی درخواست دی۔ اس کے بعد ایک کنسلٹنٹ سائیکاٹرسٹ، سینئر کلینیکل سائیکالوجسٹ اور ادارے کے ایک سینئر افسر پر مشتمل تین رکنی بورڈ نے 5 اور 18 اگست کو ملزم کا معائنہ کیا۔

میڈیکل رپورٹ میں کہا گیا ہے کہ ملزم کو بار بار جنونی کیفیت اور ڈپریشن کے دورے پڑتے ہیں جبکہ درمیان میں وقتی بہتری بھی آتی ہے۔ رپورٹ میں مزید بتایا گیا کہ کچھ لیبارٹری ٹیسٹ تجویز کیے گئے تھے جن کے نتائج تاحال زیرِ التوا ہیں۔

ملزم کے اہل خانہ اور پڑوسیوں نے گرفتاری کے وقت ہی دعویٰ کیا تھا کہ وہ ذہنی طور پر معذور ہے۔ غریب خاندان وکیل رکھنے سے قاصر ہے، عدالت کی جانب سے سرکاری وکیل فراہم کیا گیا ہے لیکن وہ بھی اب تک ملزم سے ملاقات نہیں کر سکے۔ اہلِ خانہ کے مطابق مالی مشکلات کی وجہ سے وہ جیل میں ملاقات کے لیے بھی شاذ و نادر ہی جا پاتے ہیں۔

ملزم کی والدہ گرفتاری کے بعد شدید بیمار ہو گئی ہیں جبکہ چھوٹے بھائی کا کہنا ہے کہ “ہم صرف چار بار جیل جا سکے ہیں، ایک ماہ قبل آخری ملاقات کی تھی، لیکن ہمیں یہ بھی معلوم نہیں کہ اسے علاج اور دیکھ بھال میسر ہے یا نہیں، حتیٰ کہ میڈیکل رپورٹ تک بھی رسائی نہیں۔”

ادھر سرکاری وکیل کا کہنا ہے کہ مقدمے کی کارروائی اس وقت تک شروع نہیں ہو سکتی جب تک ویڈیو کی فارنزک رپورٹ موصول نہیں ہو جاتی، جو اب بھی التوا کا شکار ہے۔