روس کی جنگ بندی سے انکار امن کوششوں کو پیچیدہ بنا رہا ہے، یوکرینی صدر زیلنسکی

واشنگٹن / کیف (ڈیلی اردو/نیوز ایجنسیاں) یوکرین کے صدر ولادیمیر زیلنسکی نے کہا ہے کہ روس کی جانب سے بار بار جنگ بندی کی اپیلوں کو مسترد کرنا جنگ کے خاتمے کی کوششوں کو پیچیدہ بنا رہا ہے۔

سوشل میڈیا پلیٹ فارم ’ایکس‘ پر جاری بیان میں زیلنسکی نے کہا کہ روس نے ابھی تک یہ طے نہیں کیا کہ وہ قتل و غارت کو کب روکے گا، اور یہی صورتحال کو مزید مشکل بنا رہا ہے۔

ادھر امریکی صدر ڈونلڈ ٹرمپ نے اپنے مؤقف میں بڑی تبدیلی لاتے ہوئے کہا ہے کہ وہ جنگ بندی کے بجائے روس اور یوکرین کے درمیان براہِ راست ایک مستقل امن معاہدے کے خواہاں ہیں۔ اجلاس کے بعد سوشل میڈیا پلیٹ فارم ’ٹروتھ سوشل‘ پر بیان دیتے ہوئے ٹرمپ نے کہا کہ اکثر جنگ بندیاں دیرپا نہیں ہوتیں اور یہی وجہ ہے کہ وہ براہِ راست امن معاہدہ چاہتے ہیں۔

زیلنسکی پیر کے روز واشنگٹن جا رہے ہیں جہاں ان کی ٹرمپ سے ملاقات متوقع ہے۔ ذرائع کے مطابق ٹرمپ زیلنسکی پر دباؤ ڈال سکتے ہیں کہ وہ روسی صدر ولادیمیر پوتن کے ساتھ طے پانے والی بعض شرائط کو قبول کریں۔

اطلاعات کے مطابق پوتن نے ٹرمپ کے سامنے ایک تجویز رکھی ہے جس کے تحت یوکرین کو ڈونباس کے علاقے دونیتسک سے دستبردار ہونا ہوگا، اور اس کے بدلے میں روس زاپوریزیا اور خیرسون میں محاذ ختم کر دے گا۔

زیلنسکی نے تاہم ڈونباس پر کنٹرول چھوڑنے سے انکار کیا ہے اور کہا ہے کہ ایسا کوئی قدم روسی حملوں کے لیے اگلا پلیٹ فارم بن سکتا ہے۔ ان کا کہنا ہے کہ ماسکو کے ساتھ کسی بھی معاہدے کے لیے "مستند سلامتی کی ضمانتیں" اور ان بچوں کی واپسی ضروری ہے جنہیں ان کے بقول کریملن نے مقبوضہ علاقوں سے اغوا کیا ہے۔

یورپی سفارت کاروں کو خدشہ ہے کہ پیر کی ملاقات میں ٹرمپ زیلنسکی پر دباؤ ڈالیں گے کہ وہ پوتن کے ساتھ ہونے والی بات چیت کی شرائط تسلیم کریں۔