روس کے ساتھ جنگ میں 55 ہزار فوجی ہلاک، 70 ہزار سے زائد لاپتا، یوکرینی صدر

کییف (ڈیلی اردو) یوکرین کے صدر ولادیمیر زیلنسکی نے کہا ہے کہ روس کے ساتھ چار سالہ جنگ میں اب تک 55 ہزار یوکرینی فوجی میدانِ جنگ میں ہلاک ہو چکے ہیں جبکہ بڑی تعداد میں افراد سرکاری طور پر لاپتا ہیں۔ 

یہ اعداد و شمار انھوں نے بدھ کو فرانسیسی ٹی وی چینل فرانس 2 کو دیے گئے انٹرویو میں فراہم کیے۔

زیلنسکی نے کہا کہ یہ سرکاری تعداد یوکرین کے مجموعی نقصانات سے کم ہے اور لاپتہ افراد کی اصل تعداد اس سے کہیں زیادہ ہو سکتی ہے۔ چھ ماہ قبل یوکرین کی وزارتِ داخلہ نے 70 ہزار سے زائد افراد کو سرکاری طور پر لاپتا قرار دیا تھا، جن میں فوجی اور عام شہری دونوں شامل ہیں۔

فرانسیسی ٹی وی کو دیے گئے انٹرویو میں صدر زیلنسکی نے کہا: “یوکرین میں سرکاری طور پر میدانِ جنگ میں مارے جانے والے فوجیوں کی تعداد، چاہے پیشہ ور ہوں یا جبری بھرتی شدہ، 55 ہزار بنتی ہے۔”

بی بی سی کی رپورٹ کے مطابق روس کی جانب سے لڑائی میں مارے جانے والے تقریباً ایک لاکھ ساٹھ ہزار افراد کے ناموں کی تصدیق کی جا چکی ہے۔

امریکی صدر ڈونلڈ ٹرمپ کی قیادت میں امن مذاکرات جاری ہیں، جس میں امریکی خصوصی ایلچی سٹیو وٹکوف اور ٹرمپ کے داماد جیرڈ کشنر نے متحدہ عرب امارات کے دارالحکومت ابوظہبی میں روسی اور یوکرینی مذاکرات کاروں سے بات چیت کی۔ مذاکرات کے دوران قیدیوں کے تبادلے پر بھی اتفاق ہوا، جس میں 314 قیدی شامل ہیں۔

دوسری جانب، روس نے یوکرین پر دوبارہ حملے کیے اور توانائی کے شعبے کو نشانہ بنایا، جس سے ہزاروں افراد بجلی اور حرارت سے محروم ہو گئے جبکہ درجہ حرارت منفی 20 ڈگری سینٹی گریڈ تک گر گیا۔

صدر زیلنسکی نے کہا کہ ان ہلاکتوں اور لاپتہ افراد کی حساس تفصیلات جنگی مورال پر اثر ڈالتی ہیں، اور یوکرین کے قبرستانوں میں فوجی قبریں نمایاں طور پر قومی پرچم اور وردی میں تصاویر کے ساتھ دکھائی دیتی ہیں۔