سرحد پر ہلچل! پاکستانی حدود میں گھس کر بھارت نے رینجرز اہلکار کو اغوا کر لیا؟

واشنگٹن (ش ح ط) بھارتی بارڈر سیکیورٹی فورس (بی ایس ایف) نے 3 مئی کو راجستھان کے علاقے جیسلمیر میں پاکستانی رینجرز کے ایک اہلکار کو حراست میں لے لیا ہے۔ بھارتی حکام کے مطابق اہلکار مبینہ طور پر چولستان کے علاقے فورٹ عباس کے قریب خواجہ میر پوسٹ کے بین الاقوامی سرحد عبور کر کے بھارتی علاقے میں داخل ہوا تھا۔

مبینہ طور پر پاکستانی اہلکار کی شناخت محمد عبد اللہ کے نام سے ہوئی ہے، جسے جیسلمیر سیکٹر میں گرفتار کیا گیا۔

بھارتی سیکیورٹی ادارے اس وقت مذکورہ اہلکار سے تفتیش کر رہے ہیں جبکہ سرحدی علاقوں میں سیکیورٹی ہائی الرٹ کر دی گئی ہے۔

دوسری جانب پاکستانی سیکیورٹی ذرائع نے ڈیلی اردو کو بتایا ہے کہ محمد عبد اللہ کو ضلع بہاولنگر کے علاقے ڈونگا بونگا میں سکھاں والا (ٹھٹھنوالی) چیک پوسٹ کے قریب سے اغوا کیا گیا۔

ذرائع کا کہنا ہے کہ انڈین بی ایس ایف کی ایک یونٹ نے پاکستانی حدود کی خلاف ورزی کرتے ہوئے اہلکار کو پاکستانی علاقے سے حراست میں لیا، جسے اسلام آباد نے ایک سنگین سرحدی خلاف ورزی قرار دیا ہے۔ تاہم ان الزامات کی آزاد ذرائع سے فوری تصدیق ممکن نہیں ہو سکی۔

یہ واقعہ ایسے وقت میں پیش آیا ہے جب چند روز قبل پاکستان نے بھارتی بارڈر فورس کے اہلکار پی کے سنگھ کو پنجاب کے امرتسر سیکٹر میں مبینہ غیرقانونی داخلے پر حراست میں لیا تھا۔ دونوں ممالک کے درمیان فلیگ میٹنگز کے باوجود بھارت کا اہلکار تاحال واپس نہیں کیا گیا۔