سرینگر: بھارتی فوج میں خودکشی کے واقعات میں سنگین اضافہ

سرینگر (ڈیلی اردو/کے ایم ایس/رائٹرز) بھارتی سیکیورٹی فورسز کے اہلکاروں میں خودکشی کی شرح میں اضافہ ہوگیا، 2007 سے اب تک بھارت کے زیر انتظام جموں و کشمیر میں 587 سے زائد بھارتی فوجی خودکشی کر چکے ہیں۔

کشمیر میڈیا سروس (کے ایم ایس) کے مطابق 18 دسمبر کو بھارت کے بارڈر سیکیورٹی فورس (بی ایس ایف) کے اہلکار 92 بٹالین کے موہل مولا نے خودکشی کی۔

خبر رساں ایجنسی کے ایم ایس کے مطابق ساتھی فوجی نے بتایا کہ موہن مولا اُس وقت ڈیوٹی پر تھے جب انہوں نے خودکشی کی، اس کے علاوہ 19 دسمبر کو بھارت کی سینٹرل ریزیرو پولیس فورس (سی آر پی ایف) کے پولیس اہلکار اجے وگہیلا نے بھی خود کو پھانسی لگا لی تھی۔

رپورٹ میں بتایا گیا کہ سیکیورٹی اہلکاروں کی خودکشی کی وجہ فوجی افسران کا ہتک آمیز رویہ اور ضرورت پڑھنے پر ماتحتوں کو چھٹی نہ دینا ہے۔

کشمیر میڈیا سروس کے مطابق 2007 سے اب تک وادی کشمیر میں 587 سے زائد بھارتی فوجی خودکشی کر چکے ہیں، جبکہ غیر ملکی خبر رساں ادارے رائٹرز کے مطابق اس وقت جموں و کشمیر میں موجود بھارتی سیکیورٹی فورسز کے نصف سے زائد اہلکار شدید تناؤ کا شکار ہیں۔