سندھ: سی ٹی ڈی کی حیدر آباد میں کارروائی، ایس آر اے کے 2 دہشت گرد گرفتار

حیدر آباد (نمائندہ ڈیلی اردو) کاؤنٹر ٹیرر ازم ڈیپارٹمنٹ (سی ٹی ڈی) نے کارروائی کرتے ہوئے ’سندھو دیش ریولوشنری آرمی‘ (ایس آر اے) کے 2 دہشتگردوں کو گرفتار کر لیا۔

ایس پی سی ٹی ڈی سید عامر عباس شاہ کے مطابق سی ٹی ڈی نے کارروائی کرتے ہوئے 2 دہشتگردوں کو گرفتار کر لیا، دہشت گردوں کے قبضہ سے بارودی مواد برآمد کر لیا گیا ہے جبکہ دہشت گردوں کی تحویل سے ملنے والے مواد کو چیک کرنے کیلئے بم ڈسپوزل سکواڈ کو بھی طلب کیا گیا۔

ایس پی کے مطابق گرفتار ملزمان میں شوکت ملوکانی اور نعیم ملوکانی شامل ہیں جبکہ ایک ملزم ساجن ملوکانی موقع سے فرار ہوگیا۔

شوکت ملوکانی اور ساجن ملوکانی نے ایس آر اے کمانڈر کی ہدایت پر سردار حسین آرائیں کی ٹارگٹ کلنگ کی ، ملزمان یوم آزادی پر اسٹالز پر ہینڈ گرنیڈ پھینکنے اور ریلوے ٹریک کو اڑانے کا ارادہ رکھتے تھے، ملزمان کی تمام فنڈنگ بھارتی ایجنسی را سے ہوتی ہے، ان ملزمان کو معشوق قمبرانی ہدایات جاری کرتا تھا، ملزمان نشانہ بازی اور شوٹنگ کے ماہر ہیں۔

ایس پی سی ٹی ڈی کا کہنا ہے کہ پولیس موبائل پر فائرنگ کرنے والے دیگر دہشت گردوں کی تلاش جاری ہے، گرفتار کئے جانے والے دہشت گردوں کو تفتیش کیلئے نامعلوم مقام پر منتقل کر دیا گیا ہے۔