سویدا میں خونریز تصادم کے بعد شامی فوج کی پیش قدمی، شہر میں کرفیو نافذ

دمشق(ڈیلی اردو) شام کے جنوبی شہر سویدا میں دو روز سے جاری خونی تصادم کے بعد شامی افواج نے شہر میں داخل ہو کر کرفیو نافذ کر دیا ہے۔ یہ کارروائی دروز ملیشیا اور بدو قبائل کے جنگجوؤں کے درمیان شدید جھڑپوں کے بعد عمل میں لائی گئی ہے، جن میں اب تک لگ بھگ 100 افراد کی ہلاکت کی تصدیق ہو چکی ہے۔

پرتشدد واقعات کا آغاز اتوار کو اس وقت ہوا جب دروز برادری سے تعلق رکھنے والے ایک تاجر کو دمشق جانے والے راستے سے اغوا کیا گیا، جس کے بعد فریقین کے درمیان جھڑپیں بھڑک اٹھیں۔

بریگیڈیئر جنرل احمد الدلاتی، جو سویدا میں داخلی سلامتی کے سربراہ ہیں، نے شہر بھر میں صبح 8 بجے سے غیر معینہ مدت کے لیے کرفیو نافذ کرنے کا اعلان کیا۔ ان کے مطابق، شہریوں کی سلامتی کو یقینی بنانے اور امن و استحکام کی بحالی کے لیے مقامی مذہبی رہنماؤں اور مسلح گروہوں کی شراکت ناگزیر ہے۔

ابتدائی طور پر دروز مذہبی قیادت نے حکومتی اقدام کی حمایت کرتے ہوئے جنگجوؤں سے ہتھیار ڈالنے اور فوجی مزاحمت ترک کرنے کا مطالبہ کیا۔ تاہم، بعد ازاں اپنے مؤقف سے پیچھے ہٹتے ہوئے ایک سخت ویڈیو بیان جاری کیا گیا، جس میں حکومتی فورسز پر نہتے شہریوں پر گولہ باری کا الزام لگایا گیا اور بھرپور مزاحمت کا اعلان کیا گیا۔

صورتحال بدستور کشیدہ ہے جبکہ سویدا میں مکمل امن کے امکانات غیر یقینی دکھائی دیتے ہیں۔