کرم میں گھر پر ڈرون حملہ، ماں بیٹے سمیت 4 افراد ہلاک، 8 زخمی

کرم (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع کرم کے علاقے وراستہ میں ایک گھر پر مبینہ ڈرون حملے کے نتیجے میں ماں اور بیٹے سمیت 4 افراد ہلاک جبکہ 8 افراد زخمی ہوگئے۔

مقامی ذرائع کے مطابق متاثرہ خاندان کا تعلق سنٹرل کرم کے علاقے علی شیر زئی عیسارک سے تھا اور وہ علاقے میں جاری فوجی آپریشن کے باعث بے گھر ہونے کے بعد آئی ڈی پیز کی حیثیت سے وراستہ میں مقیم تھے۔

پولیس کے مطابق رات کے وقت ایک مبینہ گولہ گھر پر آ گرا، جس کے نتیجے میں سبیلہ زوجہ صحبت گل، عمر ولد صحبت گل، سیمہ دختر رئیس اور 10 سالہ ثناء ہلاک ہوگئیں۔

واقعے میں علیشہ زوجہ فضل عمر، کمالہ زوجہ فضل اکبر، ریشمہ دختر خان اکبر، صلاح الدین ولد فضل اکبر، شگفتہ دختر فضل اکبر، حنظلہ ولد فضل اکبر، محمد ولد محمد رئیس اور سمیرہ دختر صحبت گل زخمی ہوئے۔

زخمیوں کو فوری طور پر قریبی ہسپتال منتقل کر دیا گیا، جبکہ تین شدید زخمیوں کو تشویشناک حالت کے باعث پشاور ریفر کر دیا گیا ہے۔

پولیس کا کہنا ہے کہ واقعے کی نوعیت اور حملے کے ذمہ داروں کے تعین کے لیے تحقیقات جاری ہیں، جبکہ حکام نے جائے وقوعہ سے شواہد اکٹھے کرنا شروع کر دیے ہیں۔