سی ٹی ڈی کی پنجاب میں کارروائیاں: داعش کے 3 کمانڈرز سمیت 13 دہشت گرد گرفتار

لاہور (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) پنجاب نے صوبے بھر میں انٹیلی جنس کی بنیاد پر آپریشن کرکے داعش کے 3 کمانڈرز سمیت 13 دہشت گردوں کو گرفتار کرلیا۔

ترجمان سی ٹی ڈی کی جانب سے جاری بیان میں بتایا گیا کہ لاہور، بہاولپور، گوجرانوالہ، راولپنڈی، چنیوٹ، قصور، ملتان اور منڈی بہاالدین سے گرفتار مشتبہ افراد خطرناک منصوبہ بندی کر رہے تھے۔

ترجمان سی ٹی ڈی کا مزید کہنا تھا کہ دہشت گردوں کے قبضے سے بارودی مواد، ڈیٹونیٹر، دھماکا خیز مواد اور نقد رقم بھی برآمد ہوئی ہے۔

دہشت گردوں کی شناخت جلات خان، جنت خان، کشف رسول، غلام رحمان، اسرار، نذیر، عبدالسلام، عامر، اسد، امیر اور انور کے نام سے ہوئی۔

مزید بتایا کہ ان کے خلاف مقدمات درج کر لیے گئے ہیں اور تحقیقات جاری ہیں۔

ترجمان نے کہا کہ رواں ہفتے 339 کومبنگ آپریشنز کے دوران 34 مشتبہ افراد گرفتار کیے جبکہ 4 ہزار 113 افراد سے پوچھ کچھ کی گئی۔

بیان میں بتایا گیا کہ سی ٹی ڈی محفوظ پنجاب کے ہدف پر عمل پیرا ہے اور دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔

گزشتہ ہفتے سی ٹی ڈی پنجاب نے 21 ’دہشت گردوں‘ کو گرفتار کیا تھا، جس میں کالعدم داعش، تحریک طالبان پاکستان، سپاہ صحابہ اور لشکر جھنگوی کے دہشت گرد شامل تھے۔

اسی طرح جولائی میں سی ٹی ڈی پنجاب نے صوبے بھر میں انٹیلی جنس کی بنیاد پر کیے گئے آپریشن کے دوران 17 دہشت گردوں کو گرفتار کیا تھا جن کا تعلق کالعدم تنظیموں سے تھا۔