سیہون شریف: حضرت لعل شہباز قلندر کے مزار میں ہنگامہ آرائی کا مقدمہ 400 افراد کے خلاف درج

سیہون شریف (ڈیلی اردو) درگاہ حضرت لعل شہباز قلندر کے مزار کا مرکزی دروازہ توڑنے اور ہنگامہ آرائی کا مقدمہ 400 نامعلوم افراد کے خلاف درج کرلیا گیا، زائرین نے گیٹ توڑ کر مزار میں داخل ہونے کی کوشش کی تھی۔

تفصیلات کے مطابق صوبہ سندھ کے ضلع جامشورو کے شہر سیہون شریف میں درگاہ حضرت لعل شہباز قلندر کے مزار کا دروازہ توڑنے کے واقعے کا مقدمہ چار سو نامعلوم افراد کے خلاف درج کرلیا، مقدمے میں پولیس پر حملے اور اشتعال انگیزی سمیت دیگر دفعات شامل کی گئیں ہیں۔

گزشتہ روز حضرت لعل شہباز قلندر کے عرس میں شرکت کیلئے عقیدت مندوں کی بڑی تعداد مزار پہنچی لیکن جب انہوں نے مرکزی دروازے کو بند دیکھا تو انتظامیہ سے اسے کھولنے کا مطالبہ کیا۔

اتنظامیہ کے انکار کے بعد زائرین نے مرکزی دروازے کو توڑا اور مزار کے احاطے میں داخل ہوگئے، پولیس نے زائرین کو روکنے کی کوشش کی تو انہوں نے جواب میں پتھراؤ کیا جس سے 8 پولیس اہلکار زخمی ہوئے۔

زائرین نے درگاہ کے قریب کھڑی پانچ موٹر سائیکلوں کو بھی نذر آتش کیا جبکہ مرکزی دروازے کو توڑ کر اندر لگی قناعتوں کو بھی پھاڑ دیا تھا۔