شانگلہ: پولیس پر حملہ، 3 اہلکار ہلاک؛ جوابی کارروائی میں خودکش اور کمانڈر سمیت 3 عسکریت پسند ہلاک

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع شانگلہ میں سرچ آپریشن کے دوران کالعدم تحریک طالبان پاکستان کے عسکریت پسندوں کے حملے میں تین پولیس اہلکار ہلاک ہو گئے، جبکہ جوابی کارروائی میں ایک اہم کمانڈر اور ایک خودکش بمبار سمیت تین حملہ آور بھی ہلاک ہوگئے۔

پولیس کے مطابق شانگلہ کے علاقے پورن کے نواح میں خفیہ اطلاعات کی بنیاد پر شدت پسندوں کے خلاف بڑے پیمانے پر سرچ آپریشن شروع کیا گیا تھا۔ اسی دوران کابل گرام کے علاقے میں گھات لگائے عسکریت پسندوں نے اچانک فائرنگ کر دی۔

شدید فائرنگ کے نتیجے میں حوالدار مقبول احمد، اہلکار فدا حسین اور سعید الرحمان موقع پر ہی ہلاک ہو گئے۔ حملے کے فوراً بعد پولیس کی اضافی نفری طلب کی گئی اور علاقے کو گھیرے میں لے کر بھرپور جوابی کارروائی کی گئی۔

پولیس حکام کے مطابق مقابلے میں تین دہشت گرد ہلاک ہوئے، جن میں ایک اہم مطلوب کمانڈر بھی شامل ہے۔ اطلاعات کے مطابق ہلاک کمانڈر کے سر کی قیمت پچاس لاکھ روپے مقرر تھی اور اس کی شناخت سلمان کے نام سے ہوئی ہے۔ ایک حملہ آور نے گرفتاری سے بچنے کے لیے خودکش جیکٹ دھماکے سے اڑا دی، جبکہ دیگر شدت پسند پہاڑی علاقے کا فائدہ اٹھاتے ہوئے فرار ہوگئے۔

ذرائع کا کہنا ہے کہ دہشت گرد ایک گاڑی میں بارودی مواد تیار کر رہے تھے اور شاہراہِ ریشم پر چینی تنصیبات کو نشانہ بنانے کی منصوبہ بندی کر رہے تھے۔ علاقے میں سرچ آپریشن جاری ہے اور فرار ہونے والے عناصر کی تلاش کے ساتھ ساتھ ہلاک دہشت گردوں کے نیٹ ورک سے متعلق معلومات بھی اکٹھی کی جا رہی ہیں۔

بعد ازاں شانگلہ کے ضلعی ہیڈکوارٹر الپوری کی پولیس لائن میں سرکاری اعزاز کے ساتھ ہلاک اہلکاروں کی نماز جنازہ ادا کی گئی۔ تقریب میں پولیس اور انتظامیہ کے افسران سمیت شہریوں کی بڑی تعداد نے شرکت کی۔

انسپکٹر جنرل پولیس ذوالفقار حمید نے آپریشن میں شریک جوانوں کی ہمت اور قربانی کو سراہتے ہوئے کہا کہ خیبر پختونخوا پولیس نے دہشت گردی کے خلاف جنگ میں ہمیشہ جرات اور بہادری کا مظاہرہ کیا ہے اور یہ جدوجہد آخری دہشت گرد کے خاتمے تک جاری رہے گی۔