شمالی و جنوبی وزیرستان سے پرنسپل اور تحصیلدار اغوا، کرم میں دو شدت پسند ہلاک

واشنگٹن (ش ح ط) پاکستان کے شورش زدہ خیبر پختونخوا کے قبائلی اضلاع میں دہشت گردی اور اغوا کی نئی لہر سامنے آئی ہے۔ جنوبی وزیرستان، شمالی وزیرستان اور کرم ضلع میں الگ الگ واقعات میں ایک اسکول پرنسپل اور ایک تحصیلدار کو اغوا کر لیا گیا جبکہ سکیورٹی فورسز کی کارروائی میں دو شدت پسند مارے گئے۔

جنوبی وزیرستان: پرنسپل کا اغوا

جنوبی وزیرستان کے ہیڈکوارٹر وانا میں نیو اقرا پبلک اسکول کے پرنسپل رحمت اللہ وزیر کو اس وقت اغوا کر لیا گیا جب وہ اپنے گھر سے اسکول جا رہے تھے۔

اغوا کے دوران دہشت گردوں نے فائرنگ بھی کی جس سے دو شہری زخمی ہوگئے۔

مقامی ذرائع کے مطابق چند دن قبل وانا میں دہشت گردوں کی جانب سے پمفلٹ تقسیم کیے گئے تھے جن میں پرنسپل کو اسکول بند کرنے کی دھمکی دی گئی تھی۔

شمالی وزیرستان سے تحصیلدار اغوا

ادھر شمالی وزیرستان کے علاقے میرعلی بائی پاس سے تحصیلدار شیواہ جاوید اللہ وزیر کو نامعلوم شدت پسندوں نے اغوا کر لیا۔

واقعے کے بعد علاقے میں خوف و ہراس پھیل گیا ہے اور انتظامیہ نے تحصیلدار کی بازیابی کے لیے کوششیں شروع کر دی ہیں۔

کرم میں دہشت گردوں کے خلاف آپریشن

دوسری جانب قبائلی ضلع کرم کی تحصیل سنٹرل کرم میں سکیورٹی فورسز نے کالعدم تحریک طالبان پاکستان کے محمد امجد گروپ کے ٹھکانے کو نشانہ بنایا۔

سکیورٹی حکام کے مطابق کارروائی کے دوران دو دہشت گرد موقع پر ہلاک جبکہ ایک شدید زخمی ہوگیا۔

حکام نے دعویٰ کیا ہے کہ ہلاک دہشت گرد مقامی سطح پر بھتہ خوری اور ٹارگٹ کلنگ میں ملوث تھے۔

قبائلی اضلاع میں حالیہ ہفتوں کے دوران دہشت گردی اور پرتشدد کارروائیوں میں تیزی آئی ہے۔ مقامی عمائدین کے مطابق اغوا برائے تاوان اور دھمکی آمیز پمفلٹ تقسیم کرنے کے واقعات میں اضافہ ہو رہا ہے، جس سے عوام میں شدید خوف و بے یقینی پھیل گئی ہے۔