شمالی وزیرستان: ملک سیف اللہ کی ہلاکت کے بعد قبائل اور عسکریت پسندوں میں جھڑپیں

میرانشاہ (ڈیلی اردو)پاکستان کے شورش زدہ صوبہ خیبر پختونخوا کے قبائلی ضلع شمالی وزیرستان کے علاقے درپہ خیل میں مقامی قبائل اور عسکریت پسندوں کے درمیان اس وقت شدید جھڑپیں شروع ہو گئیں جب درپہ خیل قوم کے نوجوان اور بااثر رہنما ملک سیف اللہ کو ان کے گھر کے سامنے فائرنگ کر کے ہلاک کر دیا گیا۔

واقعے کے بعد علاقے میں صورتحال انتہائی کشیدہ ہو گئی ہے اور دونوں جانب سے وقفے وقفے سے شدید فائرنگ کا تبادلہ جاری ہے، جس سے مزید جانی نقصان کا خدشہ ظاہر کیا جا رہا ہے۔

مقامی ذرائع کے مطابق ایک روز قبل عسکریت پسندوں کے چند افراد نے علاقے کی ایک مسجد پر قبضہ کر لیا تھا، تاہم ملک سیف اللہ نے مقامی عمائدین کے ہمراہ کارروائی کرتے ہوئے انہیں مسجد سے نکال دیا تھا، جس کے بعد کشیدگی میں اضافہ ہوا۔

ذرائع کا کہنا ہے کہ آج صبح مبینہ طور پر عسکریت پسندوں کا ایک بڑا گروپ علاقے میں داخل ہوا اور ملک سیف اللہ کو گھر سے باہر بلا کر فائرنگ کا نشانہ بنایا، جس کے نتیجے میں وہ موقع پر ہی ہلاک ہو گئے۔

اس واقعے کے بعد مقامی افراد بڑی تعداد میں گھروں سے باہر نکل آئے اور حملہ آوروں کا محاصرہ کر لیا، جس کے نتیجے میں دونوں جانب سے شدید فائرنگ کا تبادلہ شروع ہو گیا۔

جھڑپ کے دوران کم از کم چار مقامی افراد زخمی ہوئے جن میں یعقوب، فضل کریم، مجاہد اور ایک نامعلوم شخص شامل ہیں۔ زخمیوں کو فوری طور پر میرانشاہ ہیڈکوارٹر ہسپتال منتقل کر دیا گیا ہے جہاں انہیں طبی امداد دی جا رہی ہے۔

مقامی ذرائع کے مطابق قبائلی افراد نے حملہ آوروں کو چاروں طرف سے گھیر لیا ہے، جبکہ جھڑپ کے دوران دو عسکریت پسندوں کے ہلاک ہونے کی بھی اطلاعات موصول ہوئی ہیں، تاہم سرکاری سطح پر اس کی تصدیق نہیں ہو سکی۔

علاقے میں بدستور کشیدگی برقرار ہے اور سکیورٹی صورتحال غیر یقینی بتائی جا رہی ہے، جبکہ مزید جھڑپوں اور جانی نقصان کے خدشات موجود ہیں۔